«Түркиядағы қазақстандықтардан министрлік жанындағы Туризм комитетіне туристік жолдамалардың күшін жою немесе қайта брондау туралы өтініштер түскен жоқ. Туристік жолдамадан бас тартқысы келетін азаматтар операторларға жүгіне алады. Олар ілеспе комиссияларды ескере отырып және қызметтер шарттарында көрсетілген шығындарды шегеріп, қайта есеп айырысуы керек», - деді Мәдениет және спорт министрлігінің ресми өкілі Мөлдір Әбдіуәлиева.
Ресми өкілдің айтуынша, туристік операторлар демалыс күндерін, бағытын, баратын елді ауыстыру және балама нұсқа ұсына алады.
«Бүгінгі таңда Түркияның демалыс орындарында 254 қазақстандық турист бар», - дейді ол.
Еске салайық, дүйсенбіде Түркияның оңтүстік-шығысындағы Газиантеп провинциясында 6,4-6,6 магнитудалы, кейін 7,4 магнитудалы қуатты жер сілкінісі болды.
Жойқын жер сілкінісінен қаза тапқандар саны бүгін 7 108-ге жетті, 40 910 адам жараланды.
Табиғат апатынан кейін Astana Hub технопаркінің халықаралық агенті Мирус Құрмашев Хатай қаласында жоғалып кетті. Мирус Құрмашевтің тағы үш әріптесі байланысқа шықпай қалды.
Түркияда, яғни зілзала аумағында қалған қазақстандықтар қайда хабарласуға болатындығы айтылған еді. Сыртқы істер министрілігінің ресми өкілі Айбек Смадияров мәлім еткендей, Қазақстан азаматтары мен олардың туыстарына арналған шұғыл желі жұмыс істеп тұр.
