Президент Қасым-Жомарт Тоқаев Премьер-министрдің орынбасары Ералы Тоғжановты қабылдады. Бұл туралы akorda.kz сайты хабарлады.
Премьер-министрдің орынбасары Мемлекет басшысына «Халықтың табысын арттыру» бағдарламасының жүзеге асырылу барысы туралы мәлімет берді.
Ералы Тоғжанов Қасым-Жомарт Тоқаевқа І жартыжылдықтың қорытындысы бойынша Бағдарлама шаралары аясында бюджет саласындағы 850 мың қызметкердің, квазисектордың өндірістік бағытында жұмыс істейтін 240 мың және бизнес құрылымдарындағы 1,2 млн еңбеккердің жалақысы өскенін баяндады.
Президентке Үкіметтің барлық әлеуметтік міндеттемелерді орындап жатқаны туралы айтылды. Жергілікті атқарушы органдармен бірлесіп, табысы жоқ азаматтардың экономикаға әлеуметтік тұрғыдан жұмылдырылуына қатысты кешенді шаралар атқарылып жатыр. Бұл ретте оларға жұмыс орындары ашылып, жаңа кәсіп түрлерін меңгеру үшін біліктіліктерін арттыруға мүмкіндік жасалып отыр.
Премьер-министр орынбасарының айтуынша, 2025 жылға дейінгі инвестициялық жобаларды жүзеге асыру аясында 2 миллионнан астам жұмыс орнын ашу жоспарланған. Оның 444 мыңы биыл ашылмақ. 1 шілдедегі мәлімет бойынша, 249 мың адам жұмыспен қамтылған. Бұл жылдық жоспардың 56 пайызына сәйкес келеді.
Әкімдіктермен бірлесіп, өңдеу өнеркәсібі, мұнай-газ химиясы салаларында және аграрлық секторда 2025 жылға дейінгі инвестициялық жобалар пулы жасақталған. Бұл тізімде 266 мыңнан астам адамды жұмыспен қамтитын 847-ге жуық жоба бар.
Сонымен қатар Мемлекет басшысына «Жастар тағылымдамасы» және «Алғашқы жұмыс орны» жобалары бойынша тағылымдамадан өту мерзімін ұзарту, еңбекақы көлемін арттыру және жастардың жаңа бизнес идеяларын жүзеге асыруға бөлінетін гранттардың көлемін өсіру жөнінде баяндалды. Халықтың әлеуметтік жағдайы төмен топтарына жататын азаматтардың тұрақты табыс табуы үшін жағдай жасалуда және әйелдерді жұмыспен қамту тетігі әзірленді.
Кездесу соңында Мемлекет басшысы халықтың табысын арттырудың маңыздылығын және мұның ұлттық жобаларда көзделген мақсаттарға қол жеткізуге тікелей байланысты екенін атап өтті. Үкіметке аталған мәселелерді ерекше бақылауда ұстау тапсырылды. Президент азаматтардың табысын арттыру жұмыстары барлық орталық және жергілікті атқару органдары үшін басты міндет болуға тиіс деп санайды.
Қымбатшылық белең алған бүгінгідей кезеңде жаңа жұмыс орындарының көптеп ашылуы құптарлық-ақ. Аузы күйген үрлеп ішетінін ескерсек, жаңадан ашылатын жұмыс орындарының 2025-ке жетпей-ақ іске кіріскені дұрыс-ау. Әйтпесе халық «сағымдай бұлдыраған» бағдарламалардан әбден шаршады. Себебі «жарқын болашақ» «2015», «2020»-да дегенге құлай сеніп, халық ілдебайлап әрең жеткенде «2030» деп аталатын «меже» алдарынан шықты. Сондықтан ұзақмерзімді бағдарламаларға елдің сенімі аз. Осыны үкімет естен шығармаса.
