Жаңа 1000 мектеп қалай салынбақ?

Үкімет отырысында Президент жолдауындағы 1000 жаңа мектеп салу тапсырмасы қалай жүзеге асырылатынын түсіндірген Білім және ғылым министрі Асхат Аймағамбетов: «Болжамға сәйкес 2025 жылы урбанизация мен туу деңгейінің өсуіне байланысты мекептерде қосымша 993 мың орынға қажеттілік пайда болады. Сондықтан орын тапшылығын болдырмау үшін 1 мың жаңа мектепті салу 4 негізгі механизм арқылы іске асырылады: мемлекеттік бюджеттен нысаналы құрылыс, мемлекеттік-жекеменшік әріптестік тетігі, жекеменшік мектептер желісін дамыту, модульдік мектептер салу. Жоспарға сәйкес биылғы жылдың өзінде 200 жаңа мектеп іске қосылады. Ал келесі төрт жыл ішінде жыл сайын 200 мектеп салынатын болады. Жергілікті атқарушы органдар осы 1000 мектепті салу үшін қажетті жер учаскелерін алдын-ала бөліп, оның интерактивті картасын әзірлеуі қажет. Оған қоса 1500, 2000, 2500, 3000 оқушыға арналған мектептердің заманауи типтік жобаларын дайындау керек деп есептейміз. Осы тапсырманың орындалуына қоғамдық бақылау жүргізу үшін арнайы электрондық портал іске қосылады»,– деді.