Өз жұмыстарын жария түрде жасап, әр кез белсенділік танытатын оралдық жастар – қашан да ел назарында.
Орал қалалық ақпараттық талдау және жастармен жұмыс жөніндегі ресурстық орталығы – жастармен тікелей жұмыс жасайтын мекемелердің бірі. Бұл орталықтағы күнделікті жұмыстарды әлеуметтік желілердегі парақшаларынан да көруге болады. Орталықтағы «Мониторинг және ақпараттық талдау» бөлімі жариялаған жазбаларға қарап, мұндағы тынымсыз тірлікті бағамдауға болады. INSTAGRAM әлеуметтік желісін ашып, «oraljastary» деген атаумен ашылған парақшаға көз жүгіртіп көріңіз. Бұл парақшадан танымал тұлғалар мен қоғам қайраткерлерінің, ақын-жазушылардың жастарға ой салатын даналық сөздерін де кездестіресіз. Сонымен қатар түрлі іс-шаралардың өту барысы қамтылған бейнебаяндарды, пайдалы кеңестерді, басқа да дүниелерді көре аласыз.
Орталық директоры Дулат Жүсіпқалиев жалпы жұмыстардың «Білім», «Шабыт», «Туған жер», «Жігер», «Ұлттық қазына» бағыттары бойынша жүргізілетінін атап өтті. – Барлық іс-шараларды бірге атқарып, сапалы нәтиже көрсетуге күш саламыз. Осындай іс-шаралардың бірі – түрлі сала өкілдері арасында ұйымдастырылған «Білімділер додасы». ҚазИТУ ғылым-білім кешенімен бірлесе ұйымдастырылған бұл интеллектуалдық сайыстың бүгінгі таңда сайты жасақталды. Ал «Жұлдызды футбол» шарасын өткізуде қаламыздағы белсенді жастар арасында салауатты өмір салтын насихаттау мақсаты көзделді. Биыл Елорда күні қарсаңында өткен аймақтық турнирге Ақтау, Атырау, Ақтөбе, Орал қалаларынан командалар қатысты. Сондай-ақ YouTube бейнехостингіндегі «Қазақша stend up» жобасы 60-70 мың шамасында қаралым жинады. Бұл жобада жайдарманшылар ерекше әзіл-қалжыңдар айтқан болатын, – деді Дулат Нұрбергенұлы.
