Қазақ үшін орамалды сыйламау ананы қорлау болып табылады. Ақ орамал әйел баласына салған сәттен жаңа түскен келін келген елінің тілеуін тілейді. Жас келіннің іздегені байлық емес, алпыс екі тамырын жібітер дүниеге әкелер болашақ ұрпағының тілеуі. Қазақта жаңа түскен келін басына орамалын салып, жанжал болған жерге сәлем салса, тіпті қантөгіс болып жатса да тоқтаған. Ақ орамалды жаулық деп те атайтыны сондықтан. Осыдан-ақ орамалдың қазақ тарихында философиялық мағынасы терең екенін ұғынуға болады.
«Ақ oрамал» акциясының негізіне дана халқымыздың ежелгі дәстүрі – татуластыру салты алынған. Акцияның басты мақсаты қазақстандықтарды шығу тегіне, олардың діни, əлеуметтік, басқа да ерекшеліктеріне қарамастан бейбітшілік идеясы аясына шоғырландыру болып табылады.
Жақында Ақбұлым ауылында «Сырласу» қыз-келіншектер клубы және округ әкімі аппаратының бас маман-әскери есеп жүргізушісі Гүлдерайым Нұрматқызы мен мәдениет қызметкерлерінің ұйымдастыруымен «Ақ орамал» акциясы аясында «дөңгелек үстел» отырысы өтті. Аталмыш шараға өнегелі аналар мен отбасылық өмірге қадам басып отырған инаббаты келіндер, көпбалалы аналар, «Сырласу» қыз-келіншектер клубының төрайымы Рабиға Сырғабаева қатысты. Жүздесуде қазақ халқының үлгілі тәлім-тәрбиесі, ұрпақтан ұрпаққа жалғасқан игі дәстүрі жайында мәнді әңгіме тілегі ағытылды. Тақырып кеңінен ашылып, орамалдың қадір-қасиеті жайында әдемі әңгіме өрбіді.
Кеш соңында ауыл әкімі Ердос Бейсенов көпбалалы анаға сыйлық табыстап, Гүлдерайым Нұрматқызы мен Рабиға апаға ақ жаулық жапты.
«Ақ орамал әрбір келіншектің басына қонған бақ орамал болсын. Біздің елімізді, ер азаматтарымызды қадірлейтін жас келіншектеріміз, аналарымыз көбейе берсін. Еліміздің демографиялық санын көбейтетін біздің мейірімді, инабатты, ибалы, ақ орамал тартатын келіндеріміз көп болсын!» – деген Рабиға апа ақ батасын берді.
