Сыбайлас жемқорлыққа қарсы қызмет Мемлекет басшысының тапсырмалары аясында халықаралық ынтымақтастықты дамыту жұмысын жалғастыруда.
Агенттік өкілі Мале қаласында өткен Сауд-Мальдив халықаралық форумына қатысты. Бұл туралы агенттіктің баспасөз қызметі хабарлады.
Форумда сыбайлас жемқорлықпен күрес және туризмдегі адалдықты арттыру мәселелері қарастырылды. Шараға Ислам Ынтымақтастығы Ұйымына (ИЫҰ) мүше 40-тан астам елдің өкілдері, соның ішінде Қазақстан, Әзербайжан және Өзбекстаннан келген делегациялар қатысты.
Негізгі қатысушылардың қатарында ИЫҰ Бас хатшысы Хусейн Ибрахим Таха, Сауд Арабиясы NAZAHA басқармасының басшысы Мазин бин Ибрахим әл-Кахмус және Мальдив Сыбайлас жемқорлыққа қарсы комиссиясының президенті Уз. Адам Шамиль болды.
Қазақстандық делегация форумда еліміздің жемқорлыққа қарсы тәжірибесін таныстырып, Қасым-Жомарт Тоқаевтың тапсырмаларына сәйкес туризмді дамытуға бағытталған бейнеролик көрсетті. Бұл материал шетелдік делегациялар тарапынан Қазақстанға деген қызығушылықты арттырды, нәтижесінде кейбір елдер ынтымақтастық орнатуға ықылас танытты.
Форум туризмдегі адалдықты күшейтуге және халықаралық ынтымақтастықты тереңдетуге бағытталған ұсынымдар пакетін қабылдаумен қорытындыланды. Іс-шара Қазақстанның халықаралық аренадағы беделін нығайтып, елді жаһандық жемқорлыққа қарсы бастамаларға белсенді қатысушы ретінде көрсетті.
Айта кетейік, Transparency International халықаралық ұйымының 2024 жылғы мәліметі бойынша Қазақстанның жемқорлықты қабылдау индексі (CPI) 39 балды құрады.
Елімізде жыл сайын жақсару байқалады. Мұнда заңның үстемдігінің айқын екендігін айта кеткен жөн. Жақында Мемлекет басшысы ҰҚК-ның басшысын қабылдады. Кездесуде бірқатар құнды мәліметтер айтылған. Ақорда сайтындағы ақпаратқа жүгінсек, «Сыбайлас жемқорлық пен құқыққа қайшы басқа да әрекет жасаған мемлекеттік және құқық қорғау органдарында жұмыс істейтін 15 лауазымды тұлға құрықталды.
1,6 триллионнан аса теңге көлемінде мемлекетке келтірілетін залалға тосқауыл қойылып, оның 220 миллиард теңгесі қазынаға қайтарылды», – деген дерек айтылды.
PS: Белгілі түрде салыстырулар жасайтын болсақ, Қазақстанның жемқорлықпен болған күресі нәтижесіз емес деуге болады. Тұтас ТМД елдері арасында көрсеткіштері жақсарып келеді. Әлемдік рейтингке тартылған 180 елдің арасында біздің еліміз 2024 жылы 88 орынға табан тіреген. Ал көрші Ресей мен Әзербайжан елі 154 орында, Қырғыз Республикасы146 орын, Белоруссия 114 орынға жайғасыпты.
Ерқазы СЕЙТҚАЛИ
