Футболдан Магомед Адиев баптайтын ұлттық құрама Ұлттар лигасында Әзербайжан құрамасынан 0:3 есебімен ұтылса, бұдан кейін Ташкент қаласындағы «Пахтакор» стадионында Өзбекстан құрамасымен өткен жолдастық кездесуде қарсыластарына 2:0 есебімен есе жіберді. Бұл кездесудегі доптарды 12-минутта Ходжимат Эркинов, 45-минутта Элдор Шомуродов соқты.
Қазақстан құрамасы Біріккен Араб Әмірлігі құрамасымен өткізген жолдастық кездесуде де жеңілістің ащы дәмін татты. Ойынды БАӘ ойыншылары белсенді бастап, нәтижесінде 13-минутта Фабио Лима есеп ашты. Екінші кезеңде қазақстандық футболшылар белсенді қимыл көрсетті. Сөйтіп, ойынның 62-минутында ел құрамасынан Абат Айымбетов көздеген нысанадан мүлт кеткен жоқ. Бірақ Фабио Лима 71-минутта қайтадан БАӘ құрамасын алға шығарды. Осылайша қазақстандық футболшылар қарсыласынан 1:2 есебімен жеңіліп қалды. Енді Қазақстан құрамасы алдағы ойынын 2024 жылғы Еуропа чемпионатына іріктеу сатысында 2023 жылдың 23 наурызында Словения құрамасына қарсы өткізеді.
