Қазақстандық жас теннисшілер Іңкәр Дүйсебай мен Дильназ Машабаева Албания астанасы Тиранада 18 жасқа дейінгілер арасында өткен ITF жарысының чемпионы атанды. Қазақстан теннис федерациясы мәлім еткеніндей, қазақстандық жас спортшылар албаниялық Греси Бахри - македониялық Ива Даневамен шеберлік байқасып, қарсыластарын екі сетте 6:2, 6:2 есебімен тізе бүктірді. Қазақстандық теннисшілер жекелей сында да жартылай финалға дейін жетті. Бұл – І. Дүйсебай мен Д.Машабаеваның спорттық жолдарындағы екінші титулы. Олар бір жыл бұрын да нақ осы Тирана қаласында үздік шыққан еді.
