Бұл туралы Батыс Қазақстан облысы өңірлік коммуникациялар қызметінің кезекті баспасөз мәжілісінде белгілі болды.
Мемлекеттік қызмет істері агенттігінің БҚО бойынша департаментінің басшысы Мұрат Байсалов алдағы наурыз айында еліміздің барлық өңірлерінде, республикалық маңызы бар қалаларда және Астанада өңірлік кадрлық резервтерге іріктеу басталатынын айтты.
– Жобаның негізгі мақсаты – жас басқарушылардың өңірлік пулдарын қалыптастыру және өңірлерді дамытуға талантты жастарды тарту. Іріктеуге еліміздің 35 жастан аспаған жоғары білімді, еңбек өтілі үш жылдан кем емес азаматтары қатыса алады. Салалық бағыттары мен резервшілердің нақты санын өңірдегі әлеуметтік-экономикалық жағдайды және мемлекеттік басқару жүйесін дамытудың басымдықтарын ескере отырып, Өңірлік кадр комиссиясы айқындайды. Іріктеу индустрия және өнеркәсіп; экономика және қаржы; әлеуметтік сала; тұрғын үй-коммуналдық шаруашылық және инфрақұрылым; агроөнеркәсіптік кешен және жер қатынастары; цифрландыру; экология бағыттары аясында жүзеге асырылады, – деді Мұрат Сейлбекұлы.
Сонымен қатар департамент басшысы өңірлік кадрлық резервке іріктеудің кезеңдеріне тоқталды.
