Таяудан бері Астанадағы ОКҚ алаңында облыс басшыларының қатысуымен баспасөз жиналысы өтіп жатыр. 3 қараша күні Ақмола облысының әкімі Марат Ахметжанов БАҚ өкілдері алдында «Ақмола облысының әлеуметтік-экономикалық дамуы туралы» баяндама жасаған еді.
«Президентіміз Қасым-Жомарт Кемелұлы Тоқаевтің айқындаған міндеттерін жүзеге асыру жолында атқарылып жатқан жұмыстар туралы қысқаша баяндама жасайын. Жалпы биыл әлеуметтік-экономикалық даму көрсеткіштері бойынша оң нәтижелерге қол жеткіздік», – деп бастаған Марат Мұратұлы ары қарай астықты аймақтың жылға жуық уақыт ішінде қол жеткізген табыстары туралы нақты мәліметтерді тізбелеп шықты.
– Мемлекет басшысы атап өткендей, біздің басты бағытымыз – агроөнеркәсіп саласының дамуына серпін беру. Ақмола облысында ауылшаруашылығы саласын өңір экономикасының басты драйверіне айналдыру – негізгі міндеттердің бірі. Осы ретте, биыл ауылшаруашылығы өнімінен 1 трлн теңгеден астам кіріс түседі. Бұл өткен жылмен салыстырғанда бір жарым есе артық. Өңір диқандары биыл 6,6 млн тонна рекордтық астық жинады. Бір гектардан түсетін өнім көлемі 14 центнерден асты. Астықтың сапасы да барынша жоғары екенін атап өткім келеді. Астықтың 60%-дан астамы тауарлық сапасы жоғары бидай. Әрине, бұл ең бастысы диқандардың қажырлы еңбегі, мемлекеттік қолдау мен заманауи технологияларды тиімді әрі уақытылы қолданудың нәтижесі. Нәтижесінде, жоғары сапалы тұқымды себу мен минералды тыңайтқыштарды қолдану көлемі екі есе артты. Ауылшаруашылығы техникасын жаңарту да маңызды. Биыл 1 239 жаңа техника сатып алынды, – деп атап өтті Марат Ахметжанов.
Өңір басшысы ішкі туризмді дамыту, тұрғын шаруашылығында, елді мекендерді газбен қамтамасыз ету секілді көптеген салаларда қол жеткізген табыстарды айтып берді. Солардың қатарында «биыл өңірге 550 млрд теңгеден астам инвестиция салынады, 400 млрд теңгеден астам қаражат тартылады» деп атап өтті Марат Мұратұлы.
