Алматы қаласының орталығында биыл ашылып жатқан №215 мектепті қала басшылығы дәл жаңа оқу жылы басталар алдында қазақша-орысша аралас мектеп қылмақ боп қарбаласып жатыр. Әуеліде таза қазақша болады деп жоспарланған. Аралас тілді етуге жаңа мектеп маңайындағы ата-аналар түбірімен қарсы. Сол маңайда №73, №38, №125 таза орыс тілді мектеп бар екен. Енді қала басшылығы мына мектепті де аралас етпек болып жанталасуда. Жанталасып жатқанын мынадан-ақ біле беруге болады. Мектепті таза қазақ тілді етуді талап еткен Дарқан Ардақұлы есімді мұғалімді «Жұртты митингке шақырдың!» – деген желеумен 15 тәулікке қамап тастаған. Тағы бір дәлелі, осы мәселенің бүге-шігесіне дейін жазып, Дарқанды босатуды, №215 мектепті таза қазақ тілді етуді талап еткен бір депутат ағамыздың әлеуметтік желіге жазған жанайқайын бір күн өтпей өшіртіп тастапты. Сонда бұл қайдан келген пәрмен?
Алматы қаласының білім басқармасының басшысы Сайран Сайфеденов мектептің қай тілде ашылатыны ата-аналардың сұранысына байланысты деп соғыпты. Ал ата-аналар болса, мемлекеттік мектепті таза қазақша етуді талап етіп отыр.
Былтырғы мәлімет бойынша, Алматыда 215 мемлекеттік мектеп болған. Оның 77-сі қазақ тілінде, 57-сі орыс тілінде, 78-і аралас. Бұдан басқа 127 жекеменшік мектеп жұмыс істеген. Оның қазақ тілінде оқытатыны – 33, орыс тілдісі – 54, екі тілдісі – 36. 4 мектеп таза ағылшынша.
Осы сынның өзінен-ақ қалада орыс тілінде оқитындардың саны қазақ тілінде оқитындардан басым екені аңғарылады.
Басшылықта отырған азаматтар халықты жақсылыққа бастауы тиіс емес пе? Ал біздің шенеуніктер керісінше елді құрдымға итеріп жатыр ғой.
Нұрлыбек САМАТҰЛЫ
