Қазіргі таңда «екі қолға бір жұмыс» емес, екі қолға бірнеше жұмыс істеуге де мүмкіндік туған заман. Тек қана берік сенім, жұмысқа деген ынта-жігер болса жетіп жатыр.
Астана қаласында 11 мамыр күні бос жұмыс орындарына арналған кезекті жәрмеңке өтті. Шараны ұйымдастырушы орын – Астана қаласы әкімдігінің «Халықты жұмыспен қамту орталығы» коммуналдық мемлекеттік мекемесі. Бұл жәрмеңкенің бір ерекшелігі жәрмеңкеге қатысушылардың арасында әдеттегідей түрлі мамандық иелерінен бөлек түрмеден жазасын өтеп шыққан азаматтар мен пробация қызметінің есебінде тіркеуде тұрғандар, бұдан бөлек алимент үшін берешегі бар азаматтарға да жұмыс істеу орайын бергендігі болды.
Мұндай жәрмеңкелер бас қалада дәстүрлі түрде өткізіліп тұрады. Күн сайын іргесі кеңейіп, жұмыс орындары көптеп ашылып, қарқынды дамып келе жатқан қалада түрлі мамандық иелеріне сұраныс көп. Бұл бір жағынан еңбек нарығының жақсаруына ықпал етсе, екіншіден, қоғамның орнықтылығы үшін де ықпалы бар екені белгілі. Елімізде қоғамдағы түрлі санаттағы адамдарды жұмыспен қамту тетіктері ең алдымен заңмен реттелгендігін айта кеткен жөн. Бұл жөнінде ҚР Қылмыстық-атқару кодексінің «Бас бостандығынан шектеу түрде жазасына сотталған адамдарға пробациялық бақылауды жүзеге асыру және оларға әлеуметтiк-құқықтық көмек көрсету тәртiбi» 174-бабының 3-тармағында көрсетілген. Бұдан бөлек ҚР Үкіметінің 2014 жылғы 23 қазандағы №1131 қаулысымен бекітілген Пробация қызметінің есебінде тұрған адамдарға әлеуметтік-құқықтық көмек көрсету қағидаларын іске асыру жөніндегі қаулысында да пробациялық есепте тұрған азаматтарды жұмысқа бейімдеу туралы нұсқаулар бар. Ал Астана қаласы әкімдігі осыдан бірер жыл бұрын еліміздің Халықты жұмыспен қамту туралы заңдарындағы белгілемелерге сүйене отырып,жұмыс орындарының квотасын белгілеу туралы қаулы қабылдаған еді. Аталған қаулыда жұмыскерлердің санының белгілі пайызын мүгедек азаматтарға, пробациялық тіркеуде тұрған азаматтарға бөлу туралы анық көрсетілген болатын. Әрі бұл жұмыстың қала әкімдігінің тікелей бақылауында болатындығы айтылған еді. Міне, осындай талаптар мен мемлекеттік ынталандыру нәтижесінде, кәсіпкерлер мен түрлі жұмыс орындарының басшылары аталған санаттағы азаматтарды жұмыспен қамтуды қолға алып жатыр. Бұл өз кезегінде Қазақстан Республикасының әрбір азаматына деген мемлекеттің жауапкершілігі мен қамқорлығы дер едік.
Мұндай игі шаралар алдағы уақытта да жалғасын таба бермек.
