Қазақстан ұлттық құрамасының жартылай қорғаушысы, 26 жастағы Айбол Әбікен допинг қолданғаны үшін 4 жылға футболдан шеттетілді. Қазақстан допингке қарсы орталығы мәлім еткендей, мамыр айында Айбол Әбікеннің ағзасынан тыйым салынған мельдоний (милдронат) препараты табылған болатын. Осылайша, А.Әбікен кәсіби футболға 2026 жылдың 29 сәуірінде ғана, отыз жасқа жақындағанда орала алады. Айбол – алматылық «Қайраттың» түлегі. Осымен үш жылға жетпейтін мерзім ішінде допинг табылған Қазақстан құрамасының үш ойыншысы футболдан шеттетілді. 2020 жылдың күзінде БАӘ-нің «Аль-Айн» командасында доп тепкен Бауыржан Исламхан, ал өткен жылы күзде «Тобылдың» жартылай қорғаушысы Руслан Валиуллин екі жыл мерзімге футбол ойнау құқығынан айырылған еді.
