ҚР тіл туралы заңында «Қазақстан халқын топтастырудың аса маңызды факторы болатын мемлекеттік тілді меңгеру – Қазақстан Республикасының әрбір азаматының парызы», – делінген. Біздің азаматтық парызымыз – тіл заңындағы талаптарды жүйелі түрде жүзеге асыру. Елімізде қазақ тілінің қолдану аясын кеңейтіп, мемлекеттік тілді дамыта түсуге ешқандай кедергі жоқ. Кез келген тілді меңгеру мәселесіндегі басты шарт – адамның өзінің ішкі ой-ниеті мен қажеттілігі. Алматы қаласы, Әуезов ауданына қарасты №10 қалалық емханада өзге ұлт қызметкерлері арасында қазақ тілін сөйлей білуге, мақал-мәтелдер айта білуге, өлеңдер оқи білуге байланысты іс-шара өтті. Іс-шараға халықаралық, қоғамдық-саяси «Qazadstan dauiri» газетінің Бас редакторы Ертай Айғалиұлы, емхана директоры Сәбит Бексейтұлы, комплаенс офицер Ертай Жүнісұлы, тіркеу бөлімнің менеджері Гүлмира Бектұрғанқызы қатысып, әділ қазылық етті. Ойын-сайысқа медицина қызметкерлері Тоқтыева Аида, Корикова Ольга, Уразалина Вера, Илажиева Заида, Баекешева Эльмира қатысты. Мереке Қазақстан ән ұранымен іс-шара басталып, тіл туралы қазақ зиялыларының айтқан ойлары жазылған слайд, Қазақстан туралы бейнероликтер көсетілді. I кезеңде «Сөз тапқанға...» деп аталып, қазақ тілінің төл сөздерінен басталатын немесе төл әріптері бар (ә, ө, қ, і, ұ, ү, ғ, ң) сөздер айтылды.
II «Сұрақ-жауап» кезеңінде сұрақтарға жауаптар берілді. III кезеңде «Суретті атап өтіңіз» тақырыбында тапсырмалар берілді. Іс-шараға қатысқан медицина қызметкерлері кезекпен тақтада көрсетілген суретті сипаттады. IV кезеңде, «Мақал – сөздің мәйегі» демекші, туған тілімізге қатысты тіл өнеріне байланысты мақал-мәтелдер айтылды. Іс-шара соңында қатысушы медицина қызметкерлеріне Ертай Айғалиұлы редакция атынан мақтау қағазы мен жұмсақ ойыншықтар сыйға берді. Емхананың кәсіподақ ұйымының төрайымы А.Б.Акимбаева жазу блокнотын сыйға берді. Емханада тіл мерекесіне байланысты іс-шара жоғары деңгейде өтіп, медицина қызметкерлеріне көтеріңкі көңіл күй сыйлады.
Аяужан ЖАЙЛАУҚЫЗЫ,
Алматы қаласы
