Қоғамның дамуы һәм өзгеруі сол ортада өмір сүріп жатқан адамдарға да байланысты. Бәсекелестік қарқын алған бүгінгі қоғамда жұмысшылар жұмылған жұдырықтай күш жинап, өркениеттің өркендеуіне өлшеусіз үлес қосуда.
Мемлекет басшысы Қасым-Жомарт Тоқаевтың Жарлығымен "2025 жыл - Жұмысшы мамандықтарының жылы" деп жариялануы сала мамандарының жұмыстарын бағалауы, олардың еңбектерін ел арасында насихаттау арқылы қоғамға ынталандыру болып табылады. Осы орайда, «Жаңа жағдайдағы Қазақстан: іс-қимыл кезеңі» атты Жолдауында «Өнімділікті көбейту, экономиканың ауқымдылығын және технологиялық сипатын арттыру» керектігін айтқан Мемлекет басшысы Қасым-Жомарт Тоқаевтың сөзі экономиканың өсуі тікелей жұмысшыларға байланысты екендігін айқындайды. Мұның бәрі де жұмысшы мамандығына байланысты. Бұл ретте мемлекет тарапынан да аталған мамандық иелерін даярлауға жіті көңіл бөлінуде.
"Өндіріс өлкесі" атанған ауданымызда сала мамандары қара жұмысты қайратымен атқарып, қара нардай жүкті көтеріп жүр. Өндіріс орындарында жұмысшы күші жыл сайын артып келеді. Бұл қуантарлық жағдай. Себебі, бүгінде ауданымыздағы ірі кәсіпорындар "Қазфосфат" ЖШС, "ЕвроХим - Тыңайтқыш" ЖШС- інде жоғары айлық қарастырылған. Сол арқылы халықтың әл ауқатының көтерілгендігін байқаймыз. Таңмен таласып оянып, қас қарайғанға дейін ауыр жұмысты жұғым көрмей, адал еңбек ететін жұмысшылардың мәртебесін еселеу еңбек иелеріне деген құрметтің белгісі.
Осы орайда, Мемлекет басшысы Қасым-Жомарт Тоқаевтың саясатын іске асыра отырып, жұмысшыларға түрлі деңгейдегі қолдаулардың көрсетілетінін жеткізгім келеді.
