Атаулы әлеуметтік көмек алып келген оралдық отбасылардың арасында өз алдына кәсіп ашуға ниеттенетіндер қатары артып келеді.
Күні бүгін Орал қаласында мыңнан астам отбасы атаулы әлеуметтік көмек алып отыр. Жауапты сала мамандарының айтуынша, атаулы әлеуметтік көмек алып отырған шаңырақ иелерінің арасында кәсіп ашуға талпынатындар көбейіп келеді екен. Биылдың өзінде облыс орталығындағы үш жанұя атаулы әлеуметтік көмектен бас тартып, бизнеске бет бұрған. Сондай жандардың бірі – Анита Мельничук. Ол да бірнеше жыл қатарынан атаулы әлеуметтік көмек ала отырып, бір іспен айналысуға ниет еткен жерлестеріміздің бірі. Ол 2021 жылы сурет студиясын ашыпты. Қазіргі уақытта мектеп жасындағы жиырма шақты ұл-қызға сурет салудың қыр-сырын үйретіп жүр.
– Мен атаулы әлеуметтік көмек алатын едім. Өзім үйде бала күтімімен отырдым. Бір күні менеджерден мемлекет өз кәсібін ашқысы келетіндерге қаржылай грант беретіндігі туралы естіп қалдым. Мен өзім бұрыннан сурет саламын, безендіремін. Бірінші мамандығым – суретші, екінші мамандығым – педагогикалық білім беру ісі. Өзімнің қолымнан келетін іс болғандықтан, айналысуға бел будым. Олар мені оқуға жіберді, бизнес жоспар жаздым. Кейін мемлекеттік грантты ұтып алдым. Мен балалармен жұмыс жасағанды ұнатамын. Мен осы орталықты ашқан бойда ата-
аналар балаларын курсқа жазып, әкеле бастады. Екі кіші топ, екі жоғары топ бар. Өз ісімді ашқаныма өте қуаныштымын, – дейді Анита.
Иә, тұрғындардың атаулы әлеуметтік көмекке арқа сүйемей, осылай өздерінің сүйікті ісімен айналысуға ден қойғандары көңіл қуантады. Орал қалалық жұмыспен қамту бөлімінің мамандары да атаулы әлеуметтік көмек алатындар арасында кәсіп ашуға шақыру, үгіттеу мақсатындағы жұмыстар жиі жүргізілетінін алға тартады. Нәтижесінде үш отбасы атаулы әлеуметтік көмектен бас тартып, өз кәсіптерін ашқан.
– Атаулы әлеуметтік көмек қиын жағдайға қалған азаматтарға беріледі. Бұдан бөлек балалар үшін азық-түлік пен тұрмыстық заттар беріледі. Балаларға берілетін кепілдендірілген азық-түлік сөмкесі 6 жасқа дейінгілерді қамтиды. Біз әлеуметтік көмек алушыларды қайта оқытуға жіберіп, кәсіп ашуға да шақырамыз, – дейді қалалық жұмыспен қамту бөлімі басшысының орынбасары С.Бимұхамбетова. Айтуынша, алдағы жылдары атаулы әлеуметтік көмек алатын отбасылар арасынан шығатын шағын кәсіп иелерінің санын арттыру жоспарланып отыр.
