2024 жылдың 27 маусым күні Астана қаласы Білім басқармасының ұйымдастыруымен елордалық оқушыларға арналған жазғы лагерь жобасы аясында «ASTANA POLYTECHNIC» жоғарғы колледжінде мектеп оқушыларына арналған «Балалар кәсіби лагерінің» жұмысы көрсетілді. Ұйымдастырушылардың айтуынша, оқушылар лагерьде IT-технологиялар әлемінде жаңа білімді үйреніп, уақытты тиімді өткізе алады. Олар Web әзірлеу, Графикалық дизайн, мобильді робототехника және 3D модельдеу бағдарламаларын игере алады. Жоба IT-құзыреттілік орталығы арқылы балалардың қабілеттерін диагностикалау және кәсіптік бағдарлау, сондай-ақ кәсіптік даму траекториясын қалыптастыру және оқушыларға мамандық таңдауға көмектесу мақсатында ұйымдастырылған. «Бүгін мен мектеп лагеріне бардым. Мұнда оқушылар IT-технологиялар әлеміндегі ең жаңа және маңызды білімді алады және бос уақыттарын бірнеше бағытта үлкен пайдамен өткізеді. Маған бәрі өте ұнады», – деді шараға қатысушы Алдияр. Осы жылдың жазғы кезеңінде жазғы демалыстың барлық түрлерімен 1-10 сыныптардың 200 мыңнан астам оқушысы қамтылатынын атап өткен жөн.
