Астанада Бейбітшілік және келісім сарайында Қазақстан мұсылмандары діни басқармасы өкілдігінің ұйымдастыруымен «Пайғамбар – ізгі қоғам жаршысы» атты Мәуліт кеші өтті. Мұсылмандар үшін ерекше саналатын бұл мереке адамзаттың асыл тәжі – Мұхаммед пайғамбарымыздың (оған Алланың игілігі мен сәлемі болсын) туған айына орайластырылған. «Дінім – діңгегім, дәстүрім – қазынам» деп аталған рухани кешке мыңнан аса адам жиналды. Рухани кеште Алла елшісінің өмір жолы насихатталып, дін мен дәстүрдің байланысы баяндалды.
Мәуліт кеші Бас мүфти Наурызбай қажы Тағанұлының сөзімен салтанатты түрде ашылды. ҚМДБ төрағасы елорда жұртшылығын Мәуліт айымен құттықтады. «Қасиетті Мәуліт баршамызға мүбарак болғай! Біздің жыл сайын асыға күтетін Мәуліт мерекесінде қауышып, көріскенімізге шын жүректен қуаныштымыз!» – деді. Кеште қасиетті Мәуліт жыры оқылып, елдің амандығы үшін дұға жасалды. Сондай-ақ әсерлі жыр-термелер орындалды. Сол сияқты кеш көрермендері үшін арнайы көрме де ұйымдастырылды. Айтулы кеште белгілі әнші, композитор Құрмаш Махан ән шырқап, «Номад» этно-фольклорлық ансамблі өнер көрсетті. Сондай-ақ Аstana Musical театрының актерлері түрлі тақырыптарда қойылымдар ұсынды. Мәуліт кешінің билеттерінен түскен қаражат толықтай қайырымдылыққа арналып, кеш соңында 10 адамға «Мәуліт сыйлығы» берілді. ҚМДБ осы жылды дін саласында «Ислам және дәстүр құндылығы жылы» деп жариялады. Асыл дінімізде тойланатын кез келген мереке ізгілік пен құлшылыққа, қайырымдылық пен жақсылыққа үндейді. Алла елшісінің дүниеге келген айында орындалатын амалдар мұсылман баласын тақуалыққа тәрбиелейді. Мәуліт – отбасылық мереке. Қасиетті Мәуліт айында отбасымызға ардақты Пайғамбарымыздың (оған Алланың салауаты мен сәлемі болсын) өнегелі өмірі туралы насихат айтып, Алла елшісіне салауат жолдап, қарияларға құрмет көрсетіп батасын алу, балаларымызды қуанышқа бөлеу – мерекенің сәні мен мәнін арттыратын сауапты амалдар. Пайғамбар жолын ұстанған мұсылман қашан да айналасына мейірім танытып, шуағын шашып жүреді. Бес күндік өткінші өмірде бір-біріміздің көңілімізге қаяу түсірмей, керісінше жылы сөзімізді арнап, жылулық сыйлап, ағайын-туыс бауырларға, барша адамға сырттай дұға жасап, тілеулестік ниетімізді білдіріп жүрейік. Қолдан келсе көмегімізді аямайық.
