Бүгін Шу ауданында «Мерейлі отбасы» ұлттық конкурсының өңірлік іріктеудің жеңімпаздары марапатталды. Жыл сайын дәстүрлі түрде өткізілетін ұлттық конкурстың аудан бойынша биылғы жеңімпаздары Балуан Шолақ ауылында тұратын Мадалиевтер мен Қонаев ауылындағы Оспановтар отбасы болды. Үлгілі қос әулетті жерлестеріміз жақсы таниды. Себебі олар ауылға абыройлы, ағайынға үлгі болып, ұлағатты ұрпақ тәрбиелеп, өңірдің дамуына үлес қосып жүрген жандар.
Осыған орай аудан әкімінің орынбасары Нұрлан Жақсыбаев аталған жанұяларды қабылдап, жеңістерімен құттықтады. Сондай-ақ өз тарапынан толайым табыстар тілеп, облыстық сыннан сүрінбей өтулеріне тілектестік білдірді. Сонымен қатар Мадалиевтер әулетінің кейуанасы Шымшық Уәлиқызы мен Оспановтар отбасының қариясы Жұмахан Зәукетайұлына естелік сыйлықтарды табыс етті.
Естеріңізге сала кетейік, аталмыш байқау адамгершілік құндылықтарды жаңғыртуға және отбасы мен некенің жағымды үлгісін дәріптеуге, отбасы мәртебесін арттыруға бағытталған. Үздік атанған жерлестерімізді жеңістеріңізбен құттықтаймыз!
