Түркістан облысында полиция бет-жүзді тұмшалауға тыйым салу жөнінде түсіндіру жұмыстарын жүргізуде. Бұл туралы ҚР Ішкі істер министрлігінің сайтында хабарланды.
Түркістан облысында полицейлер қоғамдық орындарда бет-жүзді толық жабатын киімдерге тыйым салуға қатысты заңнамаға енгізілген өзгерістерді тұрғындарға түсіндіруді жалғастыруда. Бұл шаралар құқық бұзушылықтардың алдын алуға және қоғамдық қауіпсіздікті күшейтуге бағытталған.
Тәртіп сақшыларының айтуынша, шектеу тек бет-әлпетті толық жабатын киімдерге – балаклава, маска және никабқа қатысты. Ал хиджаб, шейла, химар мен әл-амира секілді бетті тұмшаламайтын діни киімдер бұл норманың аясында қарастырылмайды.
Сонымен бірге ауа райының ерекшелігіне, денсаулық жағдайына, қызметтік және еңбек міндеттерін атқаруға, заңнамалық талаптарға, азаматтық қорғау шараларына немесе спорттық-мәдени іс-шараларға байланысты мұндай киімдерді қолдануға шектеу қойылмайды.
Полиция өкілдері атап өткендей, басты мақсат – азаматтардың құқықтары мен бостандықтарын, соның ішінде діни сенім еркіндігін сақтай отырып, заң талаптары аясында қоғамдық тәртіп пен қауіпсіздікті қамтамасыз ету. Бұл бағыттағы түсіндіру жұмыстары алдағы уақытта да жалғасын табады.
Естеріңізде болса, 2025 жылы 30 маусымда Мемлекет басшысы Қасым-Жомарт Тоқаев жаңа заңға қол қойған болатын. «Құқық бұзушылықтың алдын алу туралы» Қазақстан Республикасының заңына 21-4-бабы ретінде қолданысқа енген бұл заңға сәйкес қоғамдық орындарда адамдардың бет-жүзін толық жабатын киімдерді киіп жүруіне тыйым салынады делінген.
