Жуырда «Халық үніне құлақ асатын мемлекет» тұжырымдамасы шеңберінде Орал қалалық полиция басқармасында үкіметтік емес ұйымдардың өкілдерімен дөңгелек үстел өтті. Бұл туралы басқарманың баспасөз қызметі хабарлады.
Тәуелсіздік жылдарындағы ішкі істер органдарының жетістіктерін таныстыру бағытында Қазақстанның X Азаматтық форумы қарсаңында ұйымдастырылған іс-шараға Оралдағы үкіметтік емес ұйымдардың басшылары, басқарманың басшылық құрамы, ардагерлер кеңесінің төрайымы, БҚО Полиция департаменті және қалалық жергілікті полиция қызметі бөлімінің әйелдерді зорлық-зомбылықтан қорғау жөніндегі бөлімінің аға инспекторлары, өзге де мүдделі бөлініс басшылары қатысты.
Дөңгелек үстелде алғаш сөз алған БҚО ПД ЖПҚб әйелдерді зорлық-зомбылықтан қорғау жөніндегі бөлімінің аға инспекторы, полиция майоры Дильяра Саттарова тәуелсіздіктің 30 жылдығында полиция қызметінің қол жеткізген жетістіктері мен үкіметтік емес ұйымдармен ынтымақтаса атқарылған іс-шаралар нәтижесіне тоқталды.
Орал қалалық ПБ бастығының орынбасары, полиция полковнигі Қуанышқали Меңдіғұлов басқарманың тәуелсіздік жылдарындағы жемісті жұмысы туралы баяндап, үкіметтік емес ұйым өкілдері мен полиция басқармасы арасында тиімді байланыс орнағанын атап өтті.
– Учаскелік полиция инспекторлары тұрғындармен тығыз байланыста жұмыстануда. Олардың қырағылығымен көшеде әйел адамдарға күш көрсетіп, ашық түрде заттарын, сөмкелерін тартып алған күдікті лезде табылып, азаматшалар алғыстарын жаудырды. Учаскелік полиция инспекторы, полиция капитаны Марат Байарстанов облыс деңгейінде үздік деп танылып, 2019 жылы ел Президентімен кездесу құрметіне ие болды. Ал 2020 жылы бір қызметкеріміз «Жыл волонтері» атағын иеленді. «Құқық бұзушылық құрбандарына көмек көрсету жұмыстарына белсенді қатысқаны үшін» номинациясы бойынша жеңімпаз атанған ювеналдық полиция бөлімшесінен Мәдина Ерқуатқызын мақтан етеміз, – деген Қуанышқали Шаяхметұлы сақшылардың жетістіктеріне тоқталды.
Отбасы құндылықтары, жанұядағы ата-ананың рөлі, бала тәрбиесі жөнінде сөз қозғаған дөңгелек үстелге қатысушы Клавдия Саматқызы өмірлік тәжірибесімен бөлісті.
«Аналар үйінің» үйлестірушісі Зәмзәгүл Зайытқызы өзі басқаратын мекеменің жұмысы, қайырымдылық шаралары туралы әңгімелеп, болашақта полиция басқармасымен бірлесе жұмыстануға ниет білдірді.
Өткен жылғы мамыр айынан бастап Орал қалалық ПБ Жергілікті полиция қызметі бөлімінде әйелдерді зорлық-зомбылықтан қорғау тобы жұмыс жасауда. Нәтижесінде 2021 жылдың есептік кезеңінде қала аумағында барлығы 1285 арыз-шағым тіркеліп, 991 қорғау нұсқамасы қойылған. Аталмыш топтың қызметі де осы дөңгелек үстел барысында сөз болды. Дөңгелек үстелде үкіметтік емес ұйым өкілдерінің пікірлері тыңдалды. Олар әр бастамаларының қолдау табатынына сеніп, түрлі мәселелерді бірлесе шешу – тиімді нұсқа екенін баса айтты.
