Қазақстанның машина жасаушылары одағының қатысушысы – Қарағанды құю-машина жасау зауыты (KLMZ) Әбілқас Сағынов атындағы Қарағанды техникалық университетімен бірлесіп, ЖОО мен колледждер студенттері, жоғары сынып оқушылары арасында (9-12 сынып оқушылары, колледждер мен жоғары оқу орындарының студенттері) Республикалық машина жасау олимпиадасын ұйымдастырады.
Олимпиаданың мақсаты – машина жасау мамандықтарын насихаттау, болашағы зор кадрларды анықтау және елдегі білім беру мекемелерінің беделін арттыру. Ол Қазақстандағы дуалды білім беру жүйесін дамытуда маңызды рөл атқарып, студенттердің өндірістік үдерістермен және саланың талаптарымен тікелей танысуына мүмкіндік береді.
Байқау екі кезеңнен тұрады. Іріктеу кезеңі 2025 жылғы 8 қыркүйекте онлайн-форматта өтеді. Қатысушыларға логика, математика, физика және машина жасау негіздері бойынша 50 сұраққа 50 минут ішінде жауап беру ұсынылады. Нәтижелер 11 қыркүйекте klmz.pro сайтында және @klmz_maker Instagram-аккаунтында жарияланады. Бірінші кезеңнің қорытындысы бойынша 15 үздік қатысушы финалға жолдама алады.
Финалдық кезең 2025 жылғы 27 қыркүйекте Қарағанды қаласында KLMZ аумағында (Орлов көшесі, 103/2, №1 цех) өтеді. Бұл күні финалға қатысушылар теориялық және практикалық тапсырмаларды орындайды: блиц-сұрақтарға жауап беру, бөлшектердің эскизін жасау, металл құрылым элементтерін дәнекерлеу, тораптарды жинау және басқару бағдарламасын әзірлеу.
Жеңімпаздарға бағалы сыйлықтар табысталады. Бірінші орын үшін төртжылдық оқуға грант қарастырылған, екінші орынға – бір жылдық шәкіртақы, үшінші орынға – Apple MacBook ноутбугы. Сонымен қатар қазылар алқасы арнайы номинациялар бойынша үздіктерді анықтап, естелік сыйлықтар табыс етеді.
Мақсат – дарынды жастарды анықтап, қолдау көрсету. Болашақта олар Қазақстанның машина жасау саласының дамуына елеулі үлес қосады деп күтілуде.
