Петропавлдағы «Народный совет» деген сепаратистік ұйымның масқара әрекеті бүкіл республиканы дүр сілкіндірді. Әншейінде селт етпейтін биліктің заң орындары бұл жолы ресейшіл сепаратистерді сабасына түсіруге өре түрегелді. Олардың талабы да тым өрескел, тым шектен шыққандық. СҚО-ны Қазақстаннан бөліп, Ресейге беру. Мәссаған десеңші! Бүйректен сирақ шығару деген осы! Ол дегенің қоң етіңді кесіп берумен тең ғой. Жер астынан жік шыққандай олардың мұнысы несі? Оларға не жетіспей жатыр? Солардың көңіліне қарап жалбақтағанымыз соншама, өзіміздің төл тілімізді ысырып қойып, орыс тілін төрге шығарғанымыз ба біздің кінәміз? Еш мемлекетте жоқ Ассамблея құрып, өзіміз аш-жалаңаш жүрсек те, оған миллиондаған қаржы шығарып ұстап отырмыз. Тіптен, олар ренжімесінші деп, «қиналып қаларсыңдар, латын әліпбиіне көшпей-ақ қойыңдар, біз-ақ көшейік» дедік бипаздап. Асты-үстіне түсіп, қас-қабағына қараған орысшылдардың орманына қарап ұлығаны-ай!
Өткенде Батыс Қазақстанда да осылай болды. Үндемедік. Енді мінеки, өзіңнің оқ жыландарың қар астынан шыға келіп, азу тістерін ақситты. Жылан шақпасын де, шақса оның уы денеге тез жайылып, әп-сәтте жан тапсырасың. Мәлімдеме жасап отырған – он шақты адам. Бәрі де сауатты. Заңды жаңғақша шағады. Ертең мына сепаратистік пиғылдары әшкере болса, сотталатынын анық біледі. Заңда ол ап-анық жазылған. Сепаратистік пікір айтсаң бітті, 7 жылға сотталасың. Сонда ештеңеден қорықпай осындай әрекетке олар қалай барып отыр? Олардың қорғаушысы кім? Әлбетте, алыстан ши жүгіртіп, бұлардың делебесін қоздырып, қып-қызыл шоқты үрлеп қоздатып отырған – Мәскеу. «Қырымды тартып алғаны – Украинаға қол салғаны, Украинаны алғаны – онда Қазақстанға көз салғаны» демекші, осыларды түртпектеп отырғандар ертең «қазақтар орыстарды қуғындап жатыр» деп еліріп шықпасына кім кепіл?!.
Соңғы кездері орыстар миллиондап қазақ жеріне кіріп кетіпті деген қауесет тарады. Оның шын-өтірігін білмеймін, бірақ өткен аптада Ресейден келген бір орыспен сөйлесіп қалдым. «Бізге Қазақстанда ғана еркін өмір сүруге болады. Бұл жерде барлық жағдай жасалған. Өз тіліңде еркін сөйлейсің. Ешкім қуғындап жатқан жоқ. Рас, біз босқынбыз. Қазақстанға соғыстан қорыққаннан келдік. Путиннің соғысқұмарлығын біз құптамаймыз. Ол ақымақ, зұлым адам. Біздің Ресейдің деревнялары қаңырап бос қалған. Онда бизнес жасай алмайсың. Әлем бізге қыспақ жасап жатыр. Ресейде қазір жоқшылық. Соғыста қаншама адамдар қырылып жатыр. Мен де солардың бірі болғым келмейді», – деді ол.
Тағы бір зор қауіп – Қазақстанда қой терісін жамылған қоғамдық ұйымдар өте көп. Біздің заң орындары оларды тексеріп, пиғылдарын жария етуі тиіс. «Жау жоқ деме! Бөрік астында» демекші, сақ болайықшы, ағайын!
