Жақында Қырғыз Республикасының Мәдениет, ақпарат, спорт және жастар саясаты министрлігі Қырғыз Республикасының мемлекеттік әнұранының жаңа редакциясын дайындап шығару бойынша республикалық байқау басталғандығын хабарлады. Таратылған ақпаратта «Байқау жоғарғы көркемдік деңгейдегі музыкалық шығарманы дайындау мақсатында өткізіледі. Ол тарихи мирасты, мәдени салттарды және қырғыз елінің ұлттық бірлігін айқындап тұруы керек. Байқаудың басты мақсаты – қырғыз халқының асыл құндылықтарын дәріптейтін, отансүйгіштікті арттыратын және елімізге деген құрметке шақыратын жаңа мемлекеттік рәмізді жасау», – деген.
Бұл байқауға композиторлар, музыканттар, ақындар, авторлар, шығармашылық ұйымдар қатыса алады. Өтініштер 2025 жылы 20 наурызға дейінгі аралықта қабылданады. Бұдан ары қарай таңдау критерийлері мен қатысушыларға қойылатын талаптары анық көрсетілген екен. Мұның ішіне толық нұсқасы – 3 минуттан, аспаптық нұсқа – 2 минуттан аспауы керек деген шарттары бар. Байқаудан озып шыққандарға ақшалай сыйлық беру жағы да қарастырылған.
Қырғыз Республикасының әнұранын өзгерту туралы бастаманы 2024 жылғы қазанда Жоғарғы Кеңес Төрағасы Нұрланбек Шакиев көтерген екен. Қара-Қырғыз автономиялы облысы құрылғандығының 100 жылдығына арналған іс-шарада сөз сөйлеген Нұрланбек Шакиев әнұранды өзгерту туралы пікірін айтқан.
– Туды өзгерттік, енді әнұранды өзгерту керек. Оның себебі: әнұранды қабылдаған кезде, Кеңестер Одағы құрамынан бөлініп, азаттықтың алғашқы қадамдарын басып жатқан шақ еді. Бұл әнұран айтуға ауыр, әрбір қырғыз оны айта алмайды. Бұл – марш. Сондықтан бұл мәселе Жоғарғы Кеңестің құқығы әрі міндеті. Біз жақында әнұранды өзгертеміз. Кезінде біздің бір Президентіміз, оның атын айтпай-ақ қояйын, бір шетелге сапарға барыпты дейді. Қарсы алу рәсімі кезінде біздің әнұран орындалып «таа-та-та-таң» дегенде ағашта отырған құстар ұшып кетіпті дейді, сонан әлгі мемлекеттің әнұраны орындалған кезде құстар қайта келіп қоныпты, – депті Шакиев. Осыдан кейін әлеуметтік желіде, Жоғарғы Кеңес төрағасының атына түрлі сын пікірлер көбейген. Бір кездесуде осы жағдайларға қарата пікірін айтқан Шакиев:
– Әнұран туралы да айта кетейін. Әнұранды өзгертеміз десек, біреулер құптап, тағы біреулер қарсы шығып жатыр. Мен мұны жай айта салған жоқпын. Мен жөнінде пікір айтқандар «Нұрлан Шакиевті сынадым» деп сол теріс пікірінен рахат табуы мүмкін, менің қарсылығым жоқ. Жерден алып жерге, көрден алып көрге салсын! Сынасын, мен әлеуметтік желідегі 150 комментарий мен 1500 лайктың құрбаны болмаймын! Мен бір Құдайдың алдында, ар-намысымның алдында, қырғыз елінің алдында адал қызмет атқарсам болды. Әнұранды көп адамдар айта алмайды. Өнейік, өсейік, өркендейік! Қырғыз үшін, қырғыз жері, қырғыз мемлекеті үшін деген сөздер жетіспейді. Әнұран айтылып жатқанда әрбір қырғыз, мен елім үшін, жерім үшін жаралған екенмін деп сезінетіндей болуы керек, – деген. Нұрланбек Шакиевтің бұл бастамасы биліктің қолдауына ие болған. 2022 жылы басталған Қырғыз Республикасының мемлекет туына өзгерістер енгізу туралы бастаманы да алғаш Нұрланбек Шакиев көтерген екен. Алайда бұл туралы талас-тартыс молайған тұста ел Президенті Садыр Жапаров туды өзгерту туралы идеяның авторы өзі екендігін білдірген.
«Көш жүре түзеледі» дегендей, көрші қырғыз елі осылайша мемлекеттік рәміздерін қайта пысықтап жатыр.
Ерқазы СЕЙТҚАЛИ
