Панамада өткен шахматтан оқушылар арасындағы әлем чемпионатында 7 жастағы Малика Зиядин ФИДЕ-нің ең жас чемпионы атанды. Жарысқа 36 шахматшы қатысты. Олардың әрқайсысы 9 ойыннан өткізді. Нәтижесінде Малика максималды 9 ұпай жинап, жарыс жеңімпазы атанды. Жас чемпионды толағай табысымен құттықтаған Қасым-Жомарт Тоқаевтың құттықтау хатында: «Жеті жасқа дейінгі бүлдіршіндер арасында өткен сайыста жоғары деңгейде өнер көрсетіп, екі бірдей атақты иеленуің – Қазақстанның шахмат тарихында бұрын-соңды болмаған жетістік. Сен тума талантың мен жеңіске деген ерік-жігеріңнің арқасында осындай биік белесті бағындырдың. Өзің ізін басып келе жатқан қазақстандық шахмат шеберлерінің даңқты жолын лайықты жалғастыратыныңа кәміл сенемін. Сенің әрдайым жеңіс тұғырынан көрінуіңе тілектестік білдіремін», – деп жазылған.
