Қазір Төтенше жағдайлар министрлігі аймақтардағы су тасқынының алдын алу бойынша күшейтілген шараларды бастап кетті. Бұл туралы ҚР Төтенше жағдайлар министрлігі баспасөз қызметі хабарлады.
«Еліміздің әртүрлі өңірлерінде су басу қаупін азайтуға бағытталған алдын алу және инженерлік жұмыстар белсенді жүргізілуде. Оларды қорғау үшін 590 км қорғаныс бөгендері мен біліктері тұрғызылды, 822 км дренаж жүйелері, каналдар мен арықтар жөнделіп, салынды. Автомобиль және теміржол қатынастарында 960 су өткізу құрылысы орнатылып, ауыстырылды. 74 өзеннің қауіпті учаскелерінде 500 км жуық түбін тереңдету, жағалауды нығайту және арналарды тазарту жұмыстары жүргізілді. Зардап шеккендерді қабылдаудың 3,5 мыңнан астам пункті дайындалды, броньнан босатылған жағдайда тіршілікті қамтамасыз ету құралдары мен мемлекеттік материалдық резерв техникасы айқындалды. Осы шаралардың барлығы халықтың қауіпсіздігін арттыруға және ықтимал су тасқынынан болатын залалды барынша азайтуға бағытталған», – делінген таратылған хабарда.
Ал жақында Елордада алдағы су тасқыны кезеңіне Азаматтық қорғаудың мемлекеттік жүйесін дайындауға бағытталған «Көктем-2025» Республикалық командалық-штабтық оқу-жаттығулары өтті. Оқу-жаттығуды өткізудің негізгі орны Нұра ауданындағы Үркер тұрғын алабы болып таңдалды. Бүгін авариялық-құтқару және инженерлік жұмыстарды жүргізудің, эвакуациялық іс-шараларды ұйымдастырудың, зардап шеккен халықты орналастырудың, медициналық және психологиялық көмек көрсетудің практикалық элементтері пысықталды.
Оқу-жаттығуларға аула аралау жұмыстарын жүргізу, әрі зардап шеккен халыққа көмек көрсету үшін «Lider.kz» ҚБ волонтерлері, сондай-ақ қаптарды төсеу, бөгет жұмыстарын нығайту үшін ҰҰ 5573 әскери бөлімінің сарбаздары жұмылдырылды.
«2025 жылғы 6-7 наурызда еліміздің солтүстік, шығыс және орталық өңірлерінде «Су тасқыны кезеңінде ТЖ жою кезіндегі іс-қимылдарға азаматтық қорғаудың мемлекеттік жүйесінің басқару органдарын, күштері мен құралдарын дайындау» тақырыбында «Көктем-2025» Республикалық командалық-штабтық оқу-жаттығуының 2 кезеңі өткізіледі. Аталмыш оқу-жаттығуға елорданың мемлекеттік органдары мен ұйымдарынан барлығы 205 адам, 42 арнайы және инженерлік техникасы тартылды», – деп атап өтті Астана қаласы ТЖД ТЖ жою басқармасының бастығы Бауыржан Ахметалин.
