АҚШ президенті Дональд Трамп Ресейдің соғыс бастағаннан бергі ең ірі әуе шабуылын жасағанын айыптап, Ресейге тағы да санкциялар салуға дайын екенін айтты.
8 қыркүйек күні түстен кейін журналист Трамптан соңғы бірнеше күндегі Ресейдің Украинадағы жаппай шабуылдарына жауап ретінде АҚШ-тың Ресейге қарсы санкцияларының екінші кезеңін бастауға дайын ба деп сұрағанда, Трамп «Иә» деп жауап берді. Сондай-ақ Трамп әкімшілігі Ресейдің Украинаға қарсы әскери қимылдарын қаржыландыруға пайдаланатын арзан ресейлік мұнайды импорттайтын елдерге жазалаушы қосымша санкциялар салатынын мәлімдеді.
Америка Құрама Штаттары Ресей мұнайын сатып алуда Үндістан мен Қытайды ерекше атап өтті. Президент Трамптың 4 тамыздағы Truth Social әлеуметтік желісіне, Үндістан ресейлік мұнайдың үлкен көлемін сатып алып қана қоймайды, сонымен қатар оның көп бөлігін «үлкен пайдаға» ашық нарықта қайта сатады, бұл Америка Құрама Штаттарының Үндістан экспортына баж салығын АҚШ-қа екі есеге дейін 50%-ға дейін көтеруге әкеледі деп жазды.
Трамптың сөйлеген сөзінен бірнеше сағат бұрын Украина тарапы Ресей Киевке қарсы жаппай әуе шабуылының кезекті раундын бастағандығын хабарлаған еді. Украина президенті Владимир Зеленский Ресей жексенбі күнгі шабуылдарда 800-ден астам ұшқышсыз ұшақ пен 13 зымыран, оның ішінде төрт баллистикалық зымыран қолданғанын айтты.
«Қыркүйек айының басынан бері Ресей Украинаға 1300-ден астам шабуылдаушы ұшқышсыз ұшақтар, 900-ге жуық басқарылатын бомбалар және 50-ге дейін әртүрлі типтегі зымырандар ұшырды», – деді Зеленский X әлеуметтік медиа платформасындағы жазбасында.
Зеленскийдің айтуынша, соңғы шабуылдарда төрт адам қаза тауып, 44 адам жараланған. Тұрғын үйлер бүлінген, Украина министрлер кабинетінің ғимаратына зақым келген.
Президент Трамп өткен аптада Ресей мен Украина арасындағы бітімгершілік келісімге адалдығын тағы да қайталады және Украина президенті Зеленский мен Ресей президенті Владимир Путиннің тікелей келіссөздерінің күні белгіленбегендігін айтқан еді.
«Мен барлығын бақылап отырмын және оны президент Путинмен және президент Зеленскиймен талқыладым», – деді Трамп өткен сәрсенбіде CBS телеарнасына телефон арқылы берген сұхбатында.
Трамп Путин мен Зеленскийді қайшылықтарды шешу үшін екіжақты келіссөздер жүргізуге шақырды. Ол қол жеткізілген кез келген бейбіт келісімді аяқтау үшін екі ел басшыларымен үшжақты келіссөздерге қатысуға дайын екенін айтып келеді.
Путин мен Зеленский әзірге ұсынылған екіжақты келіссөздер үшін бір-бірінің астанасына барудан бас тартып отыр.
Зеленский өткен аптада ABC телеарнасына: «Ол (Путин) Киевке келе алады. Менің елім күнде зымыран шабуылына ұшырап жатқанда, мен мұндай басқыншы елдің астанасына бара алмаймын», – деді ол.
Ал Путин болса өткен аптада Ресейдің шығысында өткен экономикалық форумда жоғары деңгейдегі келіссөздерге дайын екенін, бірақ украиндықтардың Мәскеуге келуін қалайтынын айтты.
«Мен дайынмын, келіңдер, біз, әрине, жұмыс жағдайлары мен қауіпсіздікке 100 пайыз кепілдік береміз дедім», – деді ол.
Ресей мен Украина арасындағы қақтығыстар күн сайын өршіп барады. Өткен аптада еуропалық елдер атысты тоқтатуға қол жеткізілсе, қауіпсіздік кепілдігінің бір бөлігі ретінде Украинаға «бітімгершілік күштерін» орналастыруға дайын екендіктерін мәлімдеген еді. Еуропа елдерінің жаппай қарсылығы Ресейге қарсы әскери одақтың аясы кеңейіп бара жатқандай әсер қалдырғаны бар. Дегенмен бұл ұсыныстарға АҚШ біршама салқынқандылық танытып отырғандай. Ресми Вашингтон Украинада құрлық әскерлерін орналастырудан бас тартты. Дегенмен Америка Құрама Штаттары әскери қимылдарды үйлестіруге көмектесе алатындықтарын және еуропалық одақтастарына қауіпсіздік кепілдіктерінің басқа түрлерін әлеуетті түрде бере алатындығын мәлімдеді.
Ал мұндай уағдаластықтарға қарата өз қарсылығын білдірген Путин «ұрыс жалғасып жатқанда Украинаға шетелдік күштер кіретін болса, олар заңды нысанаға айналады» деп сес көрсетіп отыр.
Ақүйдің баспасөз хатшысы Каролин Ливитт өткен айда: «Президент қауіпсіздік кепілдіктерінің тұрақты бейбітшілікті қамтамасыз ету үшін маңызды екенін түсінеді және ол өзінің ұлттық қауіпсіздік тобын Еуропадағы одақтастарымызбен үйлестіруді және осы мәселелерді Украина және Ресеймен араласуды және талқылауды жалғастыруды тапсырды» деді.
