Жас ұрпақты еңбексүйгіштікке баулу – аға буынға аманат. Қай салада жүрсе де еңбек адамын дәріптеу – ұлылықтың белгісі. Ұлттық музейде «Нағыбек Нұрмұхаммедов палитрасындағы дәуір бейнесі» атты көрме өтті. Суретшінің шығармашылығының дені еңбек адамын насихаттау. Сол арқылы өз дәуірінің тыныс-тіршілігін көрсетуге күш салғаны байқалады.
12 қараша күні «Нағымбек Нұрмұхаммедов палитрасындағы дәуір бейнесі» атты көрменің салтанатты ашылу рәсімі өтті. Бұл іс-шара кескіндемеші, өнертану ғылымдарының кандидаты, Қазақ КСР-інің халық суретшісі Нағымбек Нұрмұхаммедовтың 100 жылдығына орай ұйымдастырылып, суретші шығармашылығын ұлықтауға арналды.
Экспозицияға Қазақстан Республикасы Ұлттық музейі, Н. Нұрмұхаммедов атындағы Павлодар облыстық көркем сурет музейі, Қарағанды облыстық бейнелеу өнері музейі мен Солтүстік Қазақстан музей бірлестігінің қорынан суретшінің 50-ге жуық туындысы қойылды. Көрме «Туған жер пейзаждары» және «Еңбек және абырой: еңбек адамдарының портреттері» атты екі бөлімнен тұрады.
Нұрмұхаммедов атындағы Павлодар облыстық көркемсурет музейінің экскурсия жүргізушісі Дилара Қайдар:
«Бүгінгі өтіп жатқан іс-шараға Павлодар өңіріндегі біздің мұражайдан 31 туынды әкелінді. Суретші жұмыстары тақырып және жанр жағынан алуан түрлілігі мен ауқымдылығымен ерекшеленеді. Байқасаңыздар, көбіне еңбек ерлерінің, мәдениет пен ғылым салаларының ұлы тұлғаларының портреттері ұсынылған. Әр кейіпкерінің тұлғалық мінезін қылқалам көмегімен керемет бейнелей алған. Мысалы, суретшінің ерекше туындыларының бірі «Шопандар әңгімесі» суретінде тың және тың игеру жылдарындағы мәселелерді талқылауы, өзара келіспеушілік сәттерін керемет көрсеткен».
Салтанатты іс-шараға жиналғандар «қылқалам шебері өнері де, өмірі де өскелең ұрпаққа өнеге» деп еске алды. Көрмені тамашалуға келген көрермендер суретші шығармашылығымен етене танысып, өз ойларымен бөлісті.
Клара Жарасова, көрермен:
«Суретші туындыларынан өз ісіне деген махаббатты байқадым. Көбіне халықтың рухани дүниесін, тұрмыс-тіршілігін, қазақ халқының тарихи оқиғаларын бейнелеген екен. Сол арқылы сол дәуірдің еңбек адамдарына деген құрметін тануға, сол заманның бейнесін сезінуге болады. Мен өзім Қарағандының тумасы болғандықтан, көрмеде ұсынылған пейзаждардан өңірімнің мәдени ошақтарын, тұлғаларын таныдым».
Сонымен қатар көрмеде Нағымбек Нұрмұхаммедовтың өнертану бойынша бірқатар ғылыми еңбектері мен бірнеше альбомдары, мақалалары ұсынылды.
