Орал қаласында 19-20 шілде күндері «Жайық өзенін қорғау» күніне орайластырылған бірыңғай экологиялық интернет-ресурс пен үкіметтік емес ұйымдардың дәстүрлі кездесуі өтті.
Бұл туралы Орал қалалық әкімдігінің баспасөз қызметі мәлімдеді. Аталмыш жиынға Қазақстан Республикасының экология, геология және табиғи ресурстар вице-министрі Зульфия Сүлейменова қатысты. Барлық өткізілген іс-шаралар «Қоршаған ортаны қорғау және трансшекаралық өзендер бойынша ақпаратқа қол жеткізуді қамтамасыз ету» деген негізгі тақырыпты қамтыды. Соның ішінде Жайық өзеніне қатысты мәселелер талқыға салынды.
19 шілдеде өткен дөңгелек үстел отырысында трансшекаралық өзендер мен жұртшылықтың қоршаған ортаны қорғау жөніндегі ақпаратқа қол жеткізуін қамтамасыз ету мәселелері, сондай-ақ Жайық өзенінің экологиялық жай-күйі талқыланды. Спикерлер кездесудің берілген тақырыбына сай баяндамалар оқып қана қоймай, нақты қиындықтар туралы айтып берді. Сондай-ақ оларды шешу жолдарын ұсынды. Ал шілденің 20-жұлдызында «Жайық – таза жағалау» және өзенді балықтандыру бойынша акциялар өткізілді. Өңір жастарының экологиялық мәселелерге белсенді қызығушылық танытып, Жайық өзенін сақтауға өз үлестерін қосып жүргені белгілі. Осыған байланысты жастар үшін Жайық өзені бойынша жыл сайынғы экспедиция және тақырыптарды талқылауды жалғастыру үшін алау жанында ресми емес кездесу ұйымдастырылды.
Кездесуге қатысушылар «мұндай іс-шаралар мемлекеттік органдардың, табиғат пайдаланушылардың, бірыңғай экологиялық интернет-ресурстың, үкіметтік емес ұйымдар мен жастардың белсенді өзара іс-қимылы үшін жақсы алаң болады» деген қорытындыға келді.
