Ақтөбе облысында жастар жұмыссыздығының алдын алу және жұмыспен қамту деңгейін арттыру бағытында бірқатар іс-шаралар іске асырылып жатыр. Жыл басынан бері облыста 13 мыңнан астам адам жұмыспен қамтылса, оның үштен бірі – жастар.
Ақтөбе облысы бойынша еңбек мобильдігі орталығының басшысы Алтынай Маханованың айтуынша, жыл басынан бері өңірде 1 120 жас тұрақты жұмысқа орналасқан.
– Субсидияланатын уақытша жұмыс орындарына, яғни жастар практикасы, ұрпақтар келісімшарты, алғашқы жұмыс орны жобалары бойынша 2,5 мыңнан аса жас орналастырылды, – дейді ол.
Бүгінде өңірдегі 15-35 жас аралығындағы жастардың жұмыссыздық деңгейі – 2,5%. Бұл орташа республикалық көрсеткіштен (3,5%) төмен.
– Қазіргі уақытта Еnbek.kz. порталында Ақтөбе облысы бойынша 1388 бос жұмыс орны жарияланды, оның ішінде білім және тәрбие саласында – 124, біліктілігі жоқ мамандықтар бойынша – 116, өндіріс саласында – 61, медицина және фармацевтика саласында – 105, қаржы және бухгалтерлік есеп саласында 41 бос жұмыс орны жарияланды, – дейді Алтынай Маханова.
Облыста тұрақты түрде бос жұмыс орындары жәрмеңкелері, «Қамқор» акциясы, әлеуметтік желілерде тікелей эфирлер, семинар-тренингтер, дөңгелек үстелдер, университеттер мен колледж студенттерімен кездесулер өткізіліп, жастарға мемлекет тарапынан көрсетілетін қолдаулар бойынша ақпараттар беріледі.
Жақында Қ.Жұбанов атындағы Ақтөбе өңірлік университетінде оқу орны түлектері үшін мемлекеттік қызметке бос орындар жәрмеңкесі өтті. ҚР Мемлекеттік қызмет істері агенттігінің Ақтөбе облысы бойынша департаментінің басшысы Айбек Шілманов және мемлекеттік органдардың өкілдері қатысқан жәрмеңкеде түлектерге мемлекеттік қызметтің әртүрлі саласы бойынша жүзден астам бос жұмыс орындары ұсынылды. Бүгінде өңірімізде 4 мыңнан астам мемлекеттік қызметші еңбек етіп жатыр, олардың әрбір төртіншісі – Жұбанов университетінің түлегі. Биыл өңірлік жоғары оқу орнын 3 мыңға жуық түлек тамамдағалы отыр, демек, өңірдегі мемлекеттік қызметшілердің қатары толығады деуге болады.
Айбек Шілманов өңірде мемлекеттік қызмет саласы жас мамандарға тапшы екендігін, мемлекеттік органдарда екі жүзге жуық бос орын бар екендігін айтты. Оның 80 пайызы аудандық және ауылдық деңгейде екен. Осы ретте жастардың ауылға баруын ынталандыру мақсатында «Дипломмен – ауылға» бағдарламасы аясында да мол мүмкіндік беріліп отырғандығын айтқан жөн. Биыл ауылға барған жас мамандарды көтермеақы және баспанамен қамту үшін бюджеттен өткен жылға қарағанда әлдеқайда қомақты қаржы қаралған. Мәселен, тек тұрғын үй алып беруге 960 миллион теңге бағытталмақ.
Университет ректоры Лаура Қарабасова жастарға мемлекет тарапынан осындай мүмкіндіктердің беріліп отырғандығын айтып, қолына дипломын алып, үлкен өмірге аттанғалы тұрған жастарға өздеріне лайық жұмыс тауып, еліміздің дамуына еңбек етуіне тілектестігін білдірді.
