Жұмыссыздық туралы деректерге сену қиын

    Сенаттың жалпы отырысында еліміздің Премьер-Министріне сауал жолдаған Айгүл Қапбарова: «Статистикалық деректер бойынша 2020 жылы жұмыссыздық деңгейі 4,9 пайызды құрады. Ресми статистика көрсеткендей, жұмыссыздық деңгейі бүгінгі күні өзгеріссіз қалды. Бұл — 450 753 адам. Алайда, бұл сандарға сену қиын. Көптеген дамыған елдерде эпидемиологиялық жағдайға байланысты еңбек нарығындағы жағдай күрт өзгерді, жұмыссыздық деңгейі кем дегенде 10 пайызды құрады. Ал Қазақстандағы өзгерістер – 0,2 пайыз. Бұл сандар қоғамға да, экономикалық сарапшыларға да сенім ұялатпайды. Президент Қасым-Жомарт Тоқаев мемлекеттік органдарға цифрлық ойындарды тоқтатып, азаматтардың нақты өмірін жақсартуға нақты тапсырма берді. Осыған байланысты, қалыптасқан жағдайды ескере отырып, Үкімет халықты жұмыспен қамту бойынша қандай кешенді шаралар қабылдап жатыр деген сұрақ туындайды. Бізде жұмыссыздықпен күрес бойынша қабылданып жатқан шаралардың тиімділігі төмен. Есеп комитетінің деректері бойынша дағдарысқа қарсы жобалардың бар-жоғы 14 пайызы ұзақ мерзімді экономикалық активтер мен объектілерді құруға бағытталған. Жұмыссыздыққа қарсы күресте жауапты органдар қысқа мерзімде әсер ететін әдістерді жиі таңдайды. Осыған байланысты мен осы саладағы жағдайды жақсарту бойынша бірқатар шараларды ұсынамын. Атап айтқанда, жұмыспен қамтуға жәрдемдесудің белсенді шаралары көзделген қазіргі «Еңбек» жұмыспен қамту бағдарламасына қосымша, инфрақұрылым объектілерін салу және дамыту есебінен жұмыс орындарын құру жөніндегі шараларды қамтитын «Жұмыспен қамтудың жол картасы (ЖҚЖК)» бағдарламасына бөлінген 1 трлн теңге қаражаттың дұрыс жұмсалуын қатаң қадағалау және қаржының сапалы игерілуін зерделеу жұмыстарын жүргізу қажет. Бұл екі бағдарлама түпкі мақсатынан ауытқымай, халықты тұрақты жұмыспен қамтуы тиіс»,— деді.