Достар, мен сендерге туған қаламды таныстыра кетейін. Мен Алматы қаласында тұрамын. Алматы – өте әдемі әрі ірі қала. Мұнда биік таулар, әсем ғимараттар, кең саябақтар мен демалыс орындары көп. Қала таудың баурайында орналасқан, оны қарлы шыңдары асқақтаған Іле Алатауы қоршап тұр. Сондықтан оның табиғаты ерекше сұлу. Ал қаланың ортасынан Үлкен және Кіші Алматы өзендері ағып өтеді. Таудан бастау алатын бұл өзендердің суы мөлдір әрі салқын. Көгілдір түсті көл мен биік таулар бұл мекенге тамаша көрініс береді.
Қаланың айналасында демалуға арналған көрікті жерлер өте көп. Солардың бірі – әлемге әйгілі Медеу мұз айдыны. Оның жанында Шымбұлақ тау шаңғы курорты орналасқан. Қыста адамдар шаңғы теуіп, таза ауада демалады. Ал Көктөбеге шықсаң, бүкіл қаланы жоғарыдан тамашалауға болады.
Табиғат аясында демалғысы келген жандар Алма-Арасан шатқалы, Бутаковка шатқалы және Аюсай шатқалына барса болады. Бұл жерлерде биік шыршалар өседі. Ауа өте таза, адамдар жаяу серуендеп, табиғаттың сұлулығын тамашалай алады. Сондай-ақ Табаған тауында қыста шаңғы теуіп, жазда табиғат аясында тынығуға болады. Қызықты жерлері көп болғандықтан, мен өз қаламды ерекше жақсы көремін. Осындай әдемі қалада тұрғанымды мақтаныш тұтамын.
Біздің мектебіміз де өте тамаша. Онда көп достарым бар, олар мейірімді, ақылды және әрқашан көмек қолын созуға дайын. Ең жақын достарым – Қайсар, Арсен, Әнуархан және Ержігіт. Әнуархан батыл, Қайсар сабақта үздік, Арсен әрқашан көңілді, ал Ержігіт мейірімділігімен ерекшеленеді. Біз бір-бірімізге көмектесеміз, үнемі тату-тәтті араласамыз.
Биыл біздің сыныпқа үш мұғалім жетекшілік етті. Меруерт апай, Назерке апай, Қарлығаш апай. Үшеуі де бізге білімді жақсы беріп, әрқашан қамқорлық көрсетеді. Біз мұғалімдерімізді шын жүректен сыйлаймыз, жақсы көреміз. Мен сабағымды жақсы оқуға тырысамын және туған қалам мен сыныбымды шын жүректен жақсы көремін. Болашақта білімді, парасатты әрі жауапты азамат болуды мақсат етемін.
Абдулла ТҰРАРБЕК,
№ 211 мектеп-гимназияның
2 «Ә» сынып оқушысы,
Алматы қаласы
