Алматы халықаралық әуежайы World Airport Awards 2025 премиясында Әлемдегі ең үздік жаңа терминал және Орталық Азия мен ТМД-дағы ең үздік өңірлік әуежай ретінде екі беделді марапатқа ие болды.
Алматы халықаралық әуежайы 9 сәуірде Мадридте (Испания) өткен World Airport Awards 2025 рәсімінде бірден екі беделді марапатқа ие болды. Әуежай «Әлемдегі ең үздік жаңа әуежай терминалы» атағына ие болды (жаңа халықаралық терминал үшін), сондай-ақ «Орталық Азия мен ТМД-дағы ең үздік өңірлік әуежай» деп танылды.
Бұл жетістіктер 2024 жылы өңірлік рейтингте екінші орын алған әуежайды дамытудағы маңызды қадам болды. 2025 жылғы жеңіс жаңғыртудың жоғары қарқынын, инфрақұрылымның дамуын және жолаушыларға арналған сервис сапасының жақсаруын көрсетеді. Алматы халықаралық әуежайының президенті Гокер Көсе атап өткендей: "Skytrax тарапынан мойындау - бұл біздің қызмет көрсету сапасы мен жолаушылардың көңіл толғандығының растауы. Жолаушылар тасымалы бойынша да, жүк айналымы бойынша да Орталық Азияда ең жүктемесі көп Алматы әуежайы ұзақ жылдар бойы қызмет көрсетудің жоғары сапасы тұрғысынан ең жақсы көрсеткішке қол жеткізді. Біз осы жеңіске қол жеткізгенімізді мақтан тұтамыз. Біздің күш-жігеріміз бен инвестицияларымыз әуежайды жоғары санатқа шығару үшін ешқандай үзіліссіз жалғасатын болады. Біз Қазақстан билігіне тұрақты қолдауы үшін, клиенттерімізге - әуе компанияларына - белсенді ынтымақтастығы үшін, ал қызметкерлерімізге - өз ісіне шексіз адалдығы үшін ризашылығымызды білдіреміз ."
Skytrax Бас директоры Эдвард Плейстед былай деді:
"Біз Алматы халықаралық әуежайын осы жетістіктермен құттықтаймыз. Халықаралық терминал өңірдегі инфрақұрылымдық жобалар үшін жаңа стандарт орнатты, ал Орталық Азия мен ТМД-ның үздік өңірлік әуежайы ретінде бірінші танылуы Алматы әуежайының жолаушылар арасындағы беделінің артуын растайды ".
Skytrax World Airport Awards марапаттары авиация саласында ең беделді болып саналады және әлемдегі ең ірі әуежай клиенттеріне сауалнама жүргізу негізінде беріледі. Сауалнама 2024 жылғы тамыздан 2025 жылғы ақпанға дейін өткізілді және 565 әуежайды тіркеу және тексеру, шопинг, трансфер және т.б. көптеген критерийлер бойынша бағалаған 100-ден астам елдің жолаушыларының пікірлерін қамтыды.
