12-13 қазанда Астанада өтіп жатқан Азиядағы өзара іс-қимыл және сенім шаралары жөніндегі кеңестің VI саммитіне 11 мемлекет басшылары қатысуда. Бұл туралы еліміздің Сыртқы істер министрлігінің ресми өкілі Айбек Смадияров мәлімдеді.
«Осы аптада Қазақстан астанасында жоғары және аса жоғары деңгейдегі бірқатар халықаралық іс-шара өтеді. 12-13 қазанда өтетін Азиядағы өзара іс-қимыл және сенім шаралары жөніндегі кеңестің VI саммитіне 11 мемлекет басшысы (Әзербайжан, Ирак, Иран, Қатар, Қырғызстан, Палестина, Ресей, Тәжікстан, Түркия, Өзбекстан), бір вице-президент (Вьетнам), бір төрағаның орынбасары (Қытай) және 5 министр қатысады», – дейді Айбек Смадияров. Оның сөзінше, АӨСШК VI саммитіне бақылаушы мемлекет ретінде Беларусь президенті де қатысады. «Жоғары деңгейдегі кездесу Азиядағы өзара іс-қимыл және сенім шаралары жөніндегі кеңесті шақыру туралы бастаманың 30 жылдығына орайластырылады және Қазақстанның төрағалығымен өтеді. Іс-шараға мүше мемлекеттердің, байқаушы мемлекеттердің, байқаушы ұйымдардың, серіктес ұйымдардың бірінші басшылары, сондай-ақ Қазақстан тарапының қонақтары шақырылды. Барлығы 50-ге жуық делегация келеді деп күтілуде. Азия кеңесінің саммиті пандемиядан кейінгі кезеңде Қазақстанда ғана емес, жалпы континентте де аса ауқымды сыртқы саяси оқиғалардың біріне айналады деп айтуға болады», – дейді СІМ өкілі. Айбек Смадияров алдағы саммитте Қазақстанның төраға ретіндегі екі жылдық жұмысы қорытындыланатынын, сонымен қатар саммит барысында бірқатар құжат пен шешім қабылдау жоспарланып отырғанын атап өтті.
Осыған орай елордада шет мемлекеттер мен үкімет басшыларының қатысуымен ірі халықаралық іс-шаралардың өтуіне байланысты Астана полицейлері 10 қазаннан бастап күшейтілген жұмыс режиміне көшті. «10 қазан сағат 21.00-ден бастап стационарлық бақылау бекеттерінің базасында елорда аумағына кіруді бақылау күшейтіледі. Бекеттерде қызмет атқаруды тәулік бойы құрамында полиция қызметкерлері мен Қорғаныс министрлігінің әскери қызметшілері бар мобильді топтар жүзеге асырады», – деп жазады медиа портал. Сондай-ақ ақпараттық порталдың жазуынша, көші-қон заңнамасын бұзушылықтардың алдын алу және жолын кесу мақсатында 1 қазаннан бастап «Учаске» республикалық жедел-алдын алу іс-шарасы өткізілуде. Бұл ретте елордада жол қауіпсіздігін қамтамасыз етуге және жол қозғалысы ережелерін сақтауға ерекше назар аударылатын болады. Одан бөлек өткізілетін іс-шараларға байланысты қаланың жаңа әкімшілік орталығында жолдардың кейбір учаскелерінде қозғалыс уақытша ішінара шектеледі. Осы орайда Астана қаласының полиция департаменті елорда тұрғындары мен қонақтарын өткізілетін іс-шараларға түсіністікпен қарауға шақырды және ыңғайлы болу үшін қоғамдық көлікті пайдалануды ұсынып отыр. «Қауіпсіздік және көлік кідірістерін болдырмау үшін жол жүру маршруттарын алдын ала жоспарлауды және жол қозғалысы ережелерін қатаң сақтауды сұраймыз», – дейді полиция өкілдері.
