Осыдан он шақты күн бұрын Алматы облысы, Талғар ауданына қарасты Еркін ауылында Наурыз мерекесі ерекше аталып өтті. Сол мерекелік күннің бір сәтінде біз «Айша» балабақшасының мейірімді ұжымымен танысуға мүмкіндік алдық. Балабақша ауласында ақбоз үй тігіліп, балалар әлемінің нағыз патшалығы ашылғандай әсер қалдырды. Біз сол жерде балалар патшалығының мейірімді мамандары – тәрбиешілер мен жетекшілермен әңгіме-дүкен құрдық, олардың әрбір сөзі, әрбір әрекеті балаларға деген шексіз сүйіспеншілікті көрсеткендей болды.
Патшалықтың патшайымы – меңгерушісі Гүлзира Жұмашева болса, әдіскері Жанар Битаева, музыка жетекшісі – Назгүл Мыңжасарова. Балабақша ғимараты әсем, бөлмелері кең және жарық, әр бөлме ертегідей безендірілген. Балалар жас ерекшелігіне қарай үш топқа бөлінген, жалпы 75 бүлдіршін тәрбиеленеді. Мұнда балалардың жан-жақты дамуына барлық жағдай жасалған: музыка, дене шынықтыру, ән-би, шахмат, дойбы сияқты үйірмелер әр күн сайын қызықты әрі тартымды өтеді. Тіпті ерекше «тұз-шахта» бөлмесі жұмыс істейді, ол балалардың физикалық және психологиялық дамуына қосымша әсер береді.
Балабақшадан түрлі байқауларда оза шауып келген өнерлі балалар жетерлік. Әрбір тәрбиеші өз ісінің нағыз шебері – білімді, білікті және балаға деген мейірімге толы. Мысалы, Айгерім Ахметқұлова, Риза Армиялқызы, Жанна Нұрбекова сынды тәрбиешілер балалардың қабілеттерін шыңдауда шын мәнінде тәжірибелі мамандар. Ас мәзірін дайындап, балаларға дәмді әрі пайдалы тағам ұсынатын аспаз Нұргүл Тұрсынбаева туралы айтпай кетуге болмайды – оның еңбегі де балалардың күнделікті көңіл күйі мен денсаулығына тікелей әсер етеді.
Балабақша ұжымы ата-аналармен тығыз байланыста жұмыс істейді және түрлі іс-шараларды ұйымдастыруда белсенді. Мерекелік шаралар, шығармашылық байқаулар, спорттық ойындар – бәрі де балалардың дамуына бағытталған. Қысқасы, «Айша» балабақшасы қай мәселе болса да алдына мақсат қойып, оны табысты жүзеге асыруда. Мұнда әрбір бала өзін маңызды, сүйікті және шығармашылыққа құмар сезінеді.
Балабақшадағы әр бөлме, әр ұстаздың әрекеті және әр ұйымдастырылған шара – балаларға ертегі әлеміндей әсер қалдырып, олардың қабілеттерін ашуға, таланттарын шыңдауға қызмет етеді. Еркін ауылындағы «Айша» балабақшасы шынымен де болашақ ұрпаққа сеніммен қарайтын, шығармашылық пен білімнің ошағы ретінде ерекшеленеді.
Асым СУЛАЙМАНОВ,
Алматы облысы
