Астана қаласында еңбек саласындағы «Еңбек адамы» бейнесін танымал ету жылдан-жылға қарқынды жүзеге асуда. Себебі еңбек еткен адам қай ғасырда да елге сыйлы. Халқына ұнамды. Жастарға құрметті. Еңбек еткен адам ғана маңдай терінің парқын біледі. Құнын түсінеді. Ондай еңбеккер адамның жастарға да сөзі өтімді. Ісі үлгі. Тек қазақ жұрты ғана емес, әлем халықтары еңбек адамдарына, жұмысшы мамандықтарға құрметпен қарап келеді. Мемлекет басшысы Қасым-Жомарт Тоқаев ел халқына кезекті Жолдауында «Әділетті Қазақстан: құқық тәртібі, экономикалық өрлеу, қоғамдық оптимизм» деп атауы да еңбек саласына серпін беруде.
Алда келе жатқан 2025 жылды Мемлекет басшысы «Жұмысшы мамандықтары жылы» деп жариялады. Бұл – жұмысшы табына көрсетілген құрмет. «Адал әрі табанды еңбегімен табысқа жеткен адамдар қашанда құрметті, сыйлы болуы керек. Бұл біз ұсынып отырған «Адал азамат – Адал еңбек – Адал табыс» қағидатына толық сай келеді. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді», – деді Қасым-Жомарт Тоқаев. Мемлекет басшысы Қ.Тоқаев Түркістандағы ІІ Құрылтайда сөйлеген сөзінде: «Біз ел болып еңбек адамын қадірлей білуіміз керек. Қажетсіз мамандық болмайды, біліксіз маман болады. Ерінбек еңбек еткен жан өз ісінің майталманы атанады. Ал кәсібін толық меңгерген адам қашанда сұранысқа ие. Біз еңбек адамының мәртебесін көтеруге баса мән береміз», – деп атап өтті. Осы ретте былтыр елордада «Еңбек – ел ырысы» тақырыбындағы қарапайым еңбек адамдарына арналған республикалық ақындар айтысы өткенін айтып өткен жөн. «AMANAT» партиясының қолдауымен Мәдениет және ақпарат министрлігі ұйымдастырған дәстүрлі «Алтын домбыра» жыр аламанында басаяғы 16 ақын өнер көрсетті. Сол жолы «AMANAT»-тың Атқарушы хатшысы Дәулет Кәрібек дәстүрлі доданың мәні мен маңызына тоқталып, партия алдағы уақытта да мәдениет пен өнерге, еңбек адамдарына барынша қолдау көрсете беретінін жеткізді. «Мемлекет басшысы Қасым-Жомарт Тоқаев еңбек адамының мәртебесін көтеруді үнемі айтып келеді. Есілдің жағасында екі күн бойы ерекше өнер көрсеткен ақындарымыз да еңбек адамының абыройын асқақтатып, олардың ел дамуына қосып жатқан өлшеусіз үлесін жырға қосты. Елді көркейтетін – еңбек. Айтыс деп аталатын асыл өнеріміз төрден түспесін», – деді ол. Осындай іс-шаралар Астанада жиі-жиі өтіп тұратыны жақсылық нышаны. Президенттің «Әділетті мемлекет. Біртұтас ұлт. Берекелі қоғам» атты Жолдауында еңбекқор адамның қадір-қасиеті жоғары екенін және оларды бағалауымыз керек екенін айтып, еліміз солардың арқасында дамып жатқанын тілге тиек етті. «Елімізде еңбекқор адам, кәсіби маман ең сыйлы адам болуға тиіс. Осындай азаматтар мемлекетімізді дамытады. Мен Ұлттық құрылтайда және «Жастар рухының» съезінде бұған арнайы тоқталдым. Біз қарапайым еңбек адамына құрмет көрсетуіміз керек. Қандай кәсіппен айналыссаң да, оны сапалы атқару маңызды. Жастар нақты бір мамандықтың қыр-сырын жетік білуге ұмтылғаны жөн. Өз саласының шеберіне әрдайым сұраныс болады. Өскелең ұрпақ Қазақстанда ғана емес, өзге елдерде бәсекеге қабілетті болуы керек. Көрші мемлекеттің азаматтары шетелге барып, жұмыс талғамай еңбек етіп жатыр. Олар біздің елде де өте жақсы табыс тауып жүр. Дәл осындай жандардан үлгі алу керек. Шын мәнінде, ең бастысы – адал еңбек. Біз мұны жете түсінетін ұрпақ тәрбиелеуге тиіспіз. Идеология жұмысында осыған баса мән берген жөн», – деді Президент Қасым-Жомарт Тоқаев өз сөзінде.
