Қазақстан Республикасының Президенті Қасым-Жомарт Кемелұлы Тоқаев Қазақстан халқына арналған бүгінгі Жолдауында еліміз экономикасының барлық саласы бойынша жан-жақты деректер келтіре отырып, ағымдағы хал-ахуалына ерекше тоқталып өтті және алдағы міндеттер мен жасалатын жұмыстарды нақты айқындап берді.
Мемлекет басшысының жоғары оқу орындарына қатысты міндеттері
«ТӨРТІНШІ. Инфрақұрылымға қатысты өзекті мәселелерді шешу қажет.»
Еліміздің «цифрландыру саласында қол жеткізген жетістіктерін еселей түсуі» үшін Президент жасанды интеллект технологиясын жетілдіруге қатысты Парламент депутаттарын осы жұмысқа атсалысуға шақырып, Үкіметке басым бағыт ретінде бірқатар тапсырма берді, мәселен:
· «Электронды үкімет» платформасына жасанды интеллект технологиясын барынша енгізуді ұсыну;
· Қазақстанды жасанды интеллектіні кеңінен қолданатын және цифрлық технологияларды дамытып жатқан елге айналдыру;
· келесі жылы Астанада оқушылар, студенттер, ғалымдар және кәсіпкерлер үшін әрдайым ашық болатын Жасанды интеллект ұлттық орталығын іске қосу.
«БЕСІНШІ. Еліміздің кадрлық әлеуетін біртіндеп арттыру өте маңызды».
Кадрлық әлеуетті біртіндеп арттырудың өте маңыздылығын атап өткен бесінші міндетінде жоғары оқу орындарына қатысты «экономиканы білікті мамандармен қамтамасыз ету – аса өзекті міндет...», «су, энергетика, құрылыс және басқа да салаларда қатты байқалып отырған кадр тапшылығын жою қажет» деген Мемлекет басшысы, болашақта сұранысқа ие болатын кәсіптер үшін білікті мамандар даярлауды ұсынды.
Жоғары білім саласын халықаралық білім беру кеңістігімен ықпалдастыруды жалғастырып, қолдау көрсетудің, атап айтқанда:
· маман даярлауға берілетін мемлекеттік тапсырысты біртіндеп көбейту;
· үздік университеттердің нақты сектормен байланысын нығайту;
· инновациялық саясатты еліміздің ғылыми-технологиялық басымдықтарымен үйлестіру;
· қолданбалы ғылымның әлеуетін арттырудың қажеттілігін көрсетті.
Президенттің назарынан осы саладағы кемшіліктер де тыс қалмай, «ғалымдардың шетелдегі тағылымдамасын әншейін синекураға және «академиялық туризмге» айналдырмау керектігін» атап өтті.
Кәсіптік білім беру саласына реформа жасаудың айрықша өзектілігін, «экономиканың өсімін қамтамасыз ету және инвестициялық тартымдылығын арттыру үшін аса қажет қадам» екенін баса көрсеткен Президент, 2025 жылды Жұмысшы мамандықтары жылы деп жариялады. Техникалық және кәсіби білім беру жүйесін реформалау, жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттауды ұсынып, «адал әрі табанды еңбегімен табысқа жеткен адамдар қашанда құрметті, сыйлы болуы керектігіне», «кәсібіне адал әрі жауапкершілікпен қараған адам қашанда лайықты бағасын алатынына» тоқталды.
Мемлекет басшысы «Адал азамат – Адал еңбек – Адал табыс» қағидатына толық сай келетін «еңбекқорлық, кәсібилік сияқты қасиеттер өте жоғары бағалануға тиіс» екенін, өз кәсібін жетік меңгерген мамандар ұлт сапасын арттыратындықтан, еңбек адамының мәртебесін көтерген кезде «әркім жауапкершілікті терең сезініп, өз міндетін сапалы атқаратыны» өз кезегінде еліміздің дамуына әсерін тигізетінін атап өтті.
«ТОҒЫЗЫНШЫ. Қоғамда заң мен тәртіп идеологиясын терең орнықтыру қажет».
Күрделі кезеңде қоғамымызда заң мен тәртіп идеологиясын терең орнықтырудың қажеттілігін баса айтқан Президент, тоғызыншы міндетінде «цифрлық технологиялардың күнделікті өмірге жаппай енуінен» белең ала бастаған алаяқтардан қорғану үшін «Мектептерде, жоғары оқу орындарында қаржылық және цифрлық сауаттылық негіздерін үйрететін білім бағдарламасын енгізу қажет» екеніне де тоқталды.
Қазіргі бұлыңғыр заманда еліміздің тағдырына да тікелей әсер ететіндіктен, «қиындықтарға мойымай, барлық мәселені біртіндеп, байыппен шешу», «ұзақ мерзімге арналған даму жолымыздың» айқындығы, «биік мақсаттарға жету үшін, ең алдымен, ел бірлігін сақтап, бір-бірімізге қолдау білдіріп, құрмет көрсетуіміз» қажеттігіне баса назар аударған Мемлекет басшысы, «әр адамға және баршаға бірдей мүмкіндік беретін мемлекетті, яғни Әділетті Қазақстанды болашақ ұрпаққа аманат ету – баршамызға ортақ міндет» екенін білдірді.
Сахипова Фарида Бақтыбайқызы
Халықаралық инженерлік-технологиялық университеті
«Әлеуметтік-гуманитарлық пәндер және әлем тілдері» кафедрасының қауымдастырылған профессоры, PhD докторы
