3-5 тамызда Астанада Қазақстан – Ауған бизнес-форумы өтеді. Кеше Астанаға Ауғанстанның өнеркәсіп және сауда министрі Нуриддин Азизи бастаған 210 адамнан тұратын бизнес-делегация келді. Бірақ бұл Қазақстанның «Талибан» Үкіметіне ұстанымы өзгергенін білдірмейді. Астана Талибанды мойындау мәселесінде халықаралық қауымдастықтың ұстанымын қолдайды. Бұл туралы Сыртқы істер министрінің орынбасары Қанат Тумыш мәлімдеді. «Қазақстан – Ауғанстан бизнес форумын Қазақстанда өткізу туралы шешім Ауғанстанның де-факто үкіметін мойындау фактісі болып есептелмейтінін атап өткім келеді. Бұл мәселеде біз бұрынғыдай БҰҰ Қауіпсіздік кеңесінің шешімдерін қатаң ұстанамыз. Талибанды тану мәселесінде ең алдымен, БҰҰ Қауіпсіздік кеңесінің тиісті шешімі шығу қажет екендігіне назар аударуды сұраймын», – деді Қанат Тумыш. Оның айтуынша, БҰҰ бұл мәселеге қатысты Ауғанстан билігіне бірқатар талап қойды. Атап айтқанда, инклюзивтілік пен өкілдікті қолдау, террористік ұйымдарға өз аумағын қолдануға жол бермеу, этникалық азшылықтар, әйелдер мен балаларды қоса алғанда адам құқықтарының сақталуын қамтамасыз ету қажет. Айта кетейік, 3-5 тамызда Астанада Қазақстан – Ауған бизнес-форумы өтіп, ауған тауарларының көрмесі болады. Көрмеге Ауғанстаннан 70-ке жуық компания, 150-ден астам кәсіпкер қатысады.
