«Жемқорлық – жегіқұрт». Қалай дәл тауып айтылған тәмсіл. Кез келген мемлекеттің кері кетуіне, экономикасының құлдырауына жемқорлық әсер етпек. Жемқорлықтың біздің елге де тигізіп жатқан зияны мен залалы шаш етектен. Қаншама ірі шенеуніктер сотталды. Үстінен іс қозғалып үй қамақта жатқандары жетерлік. Шетел асып қарасын батырғандары да аз емес. Бірақ жең ұшынан жалғасқан сыбайлас-жемқорлықты ауыздықтау оңай шаруа болмай тұр. Енді ірі қараны асылдандыру мен иіні түскен шаруашылықтардың еңсесін көтеруге бөлінген субсидияға қол салыпты ұрылар.
ҚР Сыбайлас жемқорлыққа қарсы іс-қимыл агенттігі субсидиялау бойынша бірқатар өңір әкімдіктерінің лауазымды тұлғаларынан құралған қылмыстық топтардың әшкереленгенін хабарлады. «Сыбайлас жемқорлыққа қарсы іс-қимыл агенттігінің арнайы ауқымды операциясы нәтижесінде ҚР Ауылшаруашылығы министрлігіне бағынышты бөлімшелер мен ұйымдардың және Нұр-Сұлтан, Шымкент қалаларының, Ақмола, Түркістан, Жамбыл облыстары, ШҚО, БҚО, Атырау, Ақтөбе облыстарының әкімдіктерінің лауазымды тұлғаларынан тұратын қылмыстық топтар әшкереленді. Олар субсидиялауға бөлінген қаражатты жымқырумен айналысқан, кәсіпкерлерден жүйелі түрде пара мен заңсыз сыйақы алудың жемқорлық схемасын ұйымдастырған. Қазіргі уақытта тергеу амалдары жүргізіліп жатыр. Заттай дәлделдер алынды. Қылмысқа қатысы бар 30-дан астам адам анықталды, олардың көпшілігі қазір кінәсін толық мойындап, тергеу тобымен ынтымақтастық орнатуда. Өзге ақпарат тергеу мүддесіне байланысты жария етілмейді», – деді ҚР Сыбайлас жемқорлыққа қарсы іс-қимыл агенттігі төрағасының көмекшісі Шыңғыс Әлекешев. Бұған дейін хабарланғандай, Сыбайлас жемқорлыққа қарсы іс-қимыл агенттігі субсидиялау саласында кешенді талдау жұмыстарын бастады. Аталған құқықбұзушылық та сол амалдар аясында анықталып отыр.
