Түркістан облысы әкімінің орынбасары Бейсенбай Тәжібаевтың төрағалығымен Түркістан облысы әкімі жанындағы әйелдер істері және отбасылық-демографиялық саясат жөніндегі комиссия отырысы өтті. Комиссия отырысына ҚР Президентінің жанындағы Әйелдер істері және отбасылық демографиялық саясат жөніндегі ұлттық комиссия мүшесі, комиссия бойынша Түркістан облысының кураторы Баян Жандосова және облыстық комиссия мүшелері, құзырлы орган қызметкерлері, аудан, қала әкімдерінің орынбасарлары және комиссия мүшелері селекторлық форматта қатысты.
Жиында облыстық білім басқармасы басшысының орынбасары Айгүл Қасымбекова Әкелер институтын дамыту және әкенің отбасылық тәрбиедегі рөлін арттыру туралы айтты. Облыс әкімінің отбасы және әйелдер істері жөніндегі штаттан тыс кеңесшісі, комиссия мүшесі Инара Намазбаева облыстық деңгейдегі гендерлік бюджеттеу жөніндегі жобаны іске асыру қорытындылары туралы баяндады.
– Бүгінгі таңда бала тәрбиесіндегі әкенің рөлін көтеру, әке институтын нығайту және балалардың бойында патриоттық сезімді, рухани-адамгершілік құндылықтарды қалыптастыру мәселелері өзара байланыста болуы тиіс. Күшті отбасының қалыптасуында, балаларды тәрбиелеу мен дамытуда, ерлердің мінез-құлқын қалыптастыруда әкелердің белсенділігі қажет. Бүгінде Қазақстан Республикасында 2030 жылға дейінгі отбасылық және гендерлік саясат тұжырымдамасын іске асыру аясында облыста тиісті жұмыстар жоспарға сай жүргізілуде, – деген Бейсенбай Тәжібаев айтылған ұсыныстар мен ескертпелерді хаттамаға түсіруді тапсырды.
Жиынның күн тәртібінде 4 мәселе қаралып, ұсыныс-пікірлер тыңдалды. Аудан, қала әкімдерінің жанындағы Әйелдер істері және отбасылық-демографиялық саясат жөніндегі комиссиялар қызметіне жасалған мониторинг қорытындысы баяндалды. Облыс әкімі жанындағы Әйелдер істері және отбасылық-демографиялық саясат жөніндегі комиссияның 2024 жылғы жұмыс қорытындылары және 2025 жылға арналған жоспарлары талқыланды.
Басқосу соңында облыс әкімінің орынбасары аталған комиссия жұмысын жандандыруды тапсырды.
Айта кетейік, өңірімізде әйелдер қауымы барлық салаларда жемісті еңбек етіп келеді. Облыс көлемінде шамамен 210 258 мың кәсіпкер болса, оның 90 мыңнан астамы – әйелдер. Статистикаға сәйкес, шағын және орта кәсіпкерліктің 43,1%-на нәзік жандылар басшылық жасауда. Әйелдердің басым бөлігі білім беру мен денсаулық саласында еңбек етуде. Сонымен қатар Түркістан облысындағы іс басындағы 5631 мемлекеттік қызметшінің 1553-ы – әйелдер. Оның ішінде, 235-і басшылық лауазымдарды атқарады.
