5 қазан күні Астана қаласында мұғалімдер күні қарсаңында ұстаздарды ардақтау іс-шаралары Р.Бағланова атындағы «Қазақстан» орталық концерт залында өтті. Елорда төрінде өткен «Ұстаз – ұлағатты ұғым» атты мерекелік концерттік бағдарлама аяулы ұстаздар қауымының беделін бір көтеріп тастағаны анық. Салтанатты іс-шара барысында елорда мен республиканың білім беру ұйымдарының үздік педагогтері марапатталды. Марапатқа ие болған мұғалімдер отандық педагогика дәстүрлерін және оқу процесіне инновациялық әзірлемелерді енгізе отырып, заман ағынымен ұмтылысты шебер үйлестіреді. ҚР Оқу-ағарту министрі Ғани Бейсембаев, Астана әкімі Жеңіс Қасымбек құттықтау сөз сөйледі.
Алғашқы болып сөз алған ҚР Оқу-ағарту министрі Ғани Бектайұлы мұғалімдерді кәсіби мерекесімен құттықтай отырып, білім саласындағы жаңалықтар мен іргелі жетістіктерді тілге тиек етті. Әлемнің бірінші ұстазы Аристотель мен әл-Фарабиге дейінгі, Ыбырай мен Алаш ағартушыларының асыл ойларын мысалға келтіре отырып айтқан сөздері көп көңілінен шықты. Концерттің алғашқы бөлімі марапаттау рәсіміне арналды. Онда орта білім беру мекемелерінің арасында ұйымдастырылған «Үздік мектеп» байқауында Абай Құнанбайұлы атындағы №87 мектеп-гимназиясы жеңіске жетті. 2023-2024 оқу жылындағы оқу-тәрбие үдерісінің қорытындысы бойынша Астана қаласы әкімінің грантын қала басшысы Жеңіс Қасымбек мырза өзі табыстады. Бес жылдық мектеп тарихындағы бұл жетістік ұжымның арқасында жеткен ортақ жеңіс, ортақ жетістік екені даусыз. «Құрметті ұстаздар! Сіздерді Ұстаздар күнімен шын жүректен құттықтаймын! Сіздердің өлшеусіз еңбектеріңіздің арқасында ғылыми жетістіктерге жетіп, медаль жеңген, республикалық және халықаралық жарыстарда Астананың атынан сынға түсетін талантты және ынтасы жоғары балалардың жаңа буыны өсіп келеді. Өткен оқу жылының өзінде елордалық оқушылар 445 медаль жеңіп алды, бұл – сіздердің еліміздің болашағына қосқан үлестеріңіз. Сіздер ыңғайлы жағдайда жұмыс істеу үшін біз елорданың білім беру инфрақұрылымын дамытуды ары қарай да жалғастырамыз. Биылғы оқу жылында 15 жаңа мектеп ашылды, ал жыл соңына дейін тағы 9 мектеп ашуды жоспарлап отырмыз. Біз сіздердің жұмыстарыңызға ерекше назар аудару қажет екенін және қолдау көрсетуді қажет ететінін түсінеміз әрі осы бағытта жұмыс істеуді жалғастырамыз», – деді Астана әкімі Жеңіс Қасымбек. Биыл Үздік оқу орындарының рейтингіне А.Құнанбайұлы атындағы №87 мектеп-гимназиясы мен ASTANA Polytechnic COLLEGE кірді. Сонымен қатар, көптеген ұстаздарға «Астана қаласының құрметті педагогы» атағы берілді: 1. Айгүл Тиынтай, Астана қаласы әкімдігінің «Ж.Аймауытов атындағы №24 орта мектебі» ШЖҚ МКК қазақ тілі мен әдебиеті пәнінің мұғалімі; 2. Болатбаева Сәуле Мұратбекқызы, Астана қаласы әкімдігінің «Райымбек батыр атындағы №50 «Қазғарыш» мектеп-лицейі» ШЖҚ МКК география пәнінің мұғалімі; 3. Қалмұрзаева Жұпаргүл Әбсәйітқызы, Астана қаласы әкімдігінің «№43 қосымша білім беру мектеп-орталығы» ШЖҚ МКК қазақ тілі мен әдебиеті пәнінің мұғалімі; 4. Бейсенбаев Дәурен Манапұлы, Астана қаласы әкімдігінің «№1 өнер мектебі» МКҚК бейнелеу өнерінің оқытушысы; 5. Иманбаева Гүлмира Еркінқызы, Астана қаласы әкімдігінің «№2 арнайы мектебі» КММ қазақ тілі мен әдебиеті пәнінің мұғалімі. Сондай-ақ, концерт барысында білім беру саласының ардагерлеріне ерекше көңіл бөлінді. Педагогтер оқушыларды тәрбиелеу мен білім беру ісіне зор үлес қосып қана қоймай, қазіргі педагогтерге құнды тәжірибе берді. Саланың 38 ардагері Оқу-ағарту министрлігінің Алғыс хаттарымен, тағы алты мұғалім қаланың білім басқармасының грамоталарымен марапатталды. Іс-шара барысында қазақстандық эстрада жұлдыздары мерекелік көңіл күй сыйлап, ұстаздар қауымына алғыс білдірді. Сахнада Тамара Асар, Мәди Сыздықов, Еркеш Хасен және т.б. өнер көрсетті. Айта кетейік, ведомстволық наградалармен 2 825 педагог марапатталды, оның ішінде «Қазақстанның еңбек сіңірген ұстазы» құрметті атағы – 1, «Қазақстан Республикасының Білім беру ісінің құрметті қызметкері» және «Ы.Алтынсарин» – 160 адам, Оқу-ағарту министрлігінің құрмет грамотасымен – 159 адам, «Астана қаласының құрметті педагогы» төсбелгісімен – 5 адам, Білім басқармасы басшысының Алғыс хатымен – 2500 адам. Елорданың білім беру ұйымдарында барлығы 27 мыңға жуық педагог жұмыс істейді. Астана қаласының №87 мектеп-гимназиясының директоры Айгүл Қашаева: «Астана қаласындағы Абай мектебі (87 мектеп-гимназия) «Үздік мектеп» байқауында жүзден жүйрік, мыңнан тұлпар болып, жеңімпаз атанды. Бүгінгі күн Абай мектебінің ұстаздары үшін естен кетпейтіндей болғаны сөзсіз. Оқушыларымыз ұстаздарын бір қуантса, тосыннан келген сый мерейімізді асыра түскені сөзсіз. Мерекелік іс-шарамызға Астана қаласы Білім басқармасының бөлім басшысы Асыл Амангелдіқызы қатысып, ұстаздарымызды марапаттады. Ы. Алтынсарин төсбелгісімен Асия Балтабайқызы, Құрмет грамотасымен Ұлжарқын Серікбайқызы, Батима Рамазанқызы, Толқын Маратқызы марапатталды. Білім басқармасы басшысының, Байқоңыр ауданы әкімінің, Кәсіподақ ұйымы басшысының грамотасымен де марапатталған ұстаздарымыз аз болмады. Еңбегі еленіп, алғысқа ие болып жатқан барша ұстаздарымызды құттықтаймыз!!! Биік тұғырларыңыздан түспей, абыройларыңыз еселене берсін! 2019 жылы құрылған мектеп биыл бесінші оқу жылына қадам басты. Қадам болғанда қандай? Құтты қадам! Сәтті қадам! Тәтті қадам! Жеңісті қадам! Келісті қадам! Жемісті қадам! 5 жыл бойы үздіксіз қызмет етіп келе жатқан мектеп ұжымына бұл – еңбектің өтеуі, бұл – құрмет, бұл – болашаққа деген аванс. Қала, республика көлемінде ұйымдастырылатын іс-шараның дені Абай мектебінде болады. Мәнді де мағыналы кездесулер мен конференциялар тұрақты түрде өтіледі. Жыл сайын білім сапасы артып, мектеп әлеуеті мен сапалық құрамы нығайып келеді. Бес жылдық еңбектің өтеуі – осы. Бұл жүлде – Астананың абыройын асырып, көтеріп жүрген мектеп мұғалімдері мен оқушыларына деген құрмет. Абай мектебінің атынан жарысқа барған жанның жүлдесіз қайтқан кезі жоқ. Әрине, бұл марапат – келешекте де осы биіктен түспей, одан сайын асқақтау үшін, биіктеу үшін берілген аванс, мол сенім. 2024-2025 оқу жылының басы осындай қуанышты жаңалықпен басталды. Ұзағынан болсын! Барша мектеп ұжымын, оқушылары мен ата-аналарын шын жүректен құттықтаймыз! Бұл – ортақ жеңіс!».
