«Қазақстан Республикасының мемлекеттік қызметі туралы» Заңына сәйкес мемлекеттік қызмет мемлекеттiк қызметшiлердiң құқықтық және әлеуметтiк қорғалуы қағидаттарына негізделеді.
Мемлекеттік қызметшілердің еңбекті, денсаулықты қорғауға, қауіпсіз және тиімді жұмыс істеу үшін қажетті еңбек жағдайларына, сондай-ақ әлеуметтік және құқықтық қорғалуға құқығы бар.
Бұл ретте, Мемлекеттік қызмет істері агенттігінің Жамбыл облысы бойынша департаменті қызметінің негізгі бағыттарының бірі азаматтар мен мемлекеттік қызметшілердің құқықтарын қорғау және оларды қалпына келтіру болып табылады.
Департаментпен қабылданған бақылау шараларының нәтижесінде облыс бойынша 629 мемлекеттік қызметшінің құқықтары қорғалды.
Мәселен, қолданыстағы заңнама талаптарына сәйкес мемлекеттiк қызметшілерге қызметтiк iссапарларға, оның iшiнде шет мемлекеттерге iссапарға баруға арналған шығыстары өтеледi.
Сонымен қатар, еңбек заңнамасында іссапар шығындарын төлеу мерзімдері бұзылғаны үшін тиісті өсімпұлдар төлеу мәселесі көзделген.
Ағымдағы жылдың өткен кезеңінде жүргізілген бақылау шараларының нәтижелерімен 70 мемлекеттік қызметшінің құқықтары қалпына келтірілді, оның ішінде 60 қызметшіге іссапар шығындары кешіктіріліп төленгені үшін тиісті өсімпұл сомалары төленсе, 10 қызметшінің қызметтерін бағалау мәселесі қайта қаралды.
Осыған ұқсас, Департаментпен жүргізілген тақырыптық талдау қорытындылары бойынша қабылданған шаралардың нәтижесінде 261 мемлекеттік қызметшіге жалпы сомасы 902 537 теңгені құрайтын тиісті өсімпұл сомалары төленді.
Сондай-ақ, 31 мемлекеттік қызметшіге жалпы сомасы 1 255 768 теңгені құрайтын іссапар шығындары төленді.
Одан бөлек, еңбек заңнамасында үстеме жұмысқа тартылған мемлекеттік қызметшілерге тынығу сағаттарын ұсыну мүмкіндігі қарастылырған.
Осы орайда, жұмыс уақыты режимінің сақталуы бойынша мемлекеттік органдарға бару арқылы мониторинг жүргізудің нәтижесінде 12 қызметшіге жалпы 14 сағаттан астам демалыс уақыттары берілді.
Ал, жұмыс уақыты режимінің сақталуына қашықтықтан «Е-қызмет» ақпараттық жүйесі арқылы мониторинг жүргізу нәтижесінде 255 мемлекеттік қызметшіге 392 сағаттан астам қосымша демалыс уақыттары беріліп, олардың бұзылған құқықтары қалпына келтірілді.
Айта кетерлігі, бүгінгі күні қолданыстағы заңнама талаптарының мүмкіндіктерін пайдалана отырып, мемлекеттік органдардың 37 қызметшісі (ЖАО – 32, ОМО АД – 5) икемді жұмыс кестесі бойынша жұмыс атқаруда.
Осы бағыттағы жұмыстар әрі қарай тұрақты түрде жүргізіліп, заңнамаға сәйкес қажетті шаралар қабылданатын болады.
