ЖЫР ЖАУҺАРЛАРЫ ЖАРЫҚ КӨРДІ

Түркістан облыстық мәдениет және халық шығармашылығы орталығы «Артымда қалсын асыл сөз» жинағын жарыққа шығарды. Аталмыш жинақ халқымыздың асыл мұрасы жыр жауһарларына арналған. Құнды қазынада Қазығұрттың көмулі тарихында қалған Төлеш ақынның еңбектері жинақталған. Елеусіз жылдар мен тағдырлы күнтізбелер тасасынан бүгінге жеткен қолжазбаларды Сақы Арынбекұлы бүгінгі дәуір белесіне табыстап отыр. Ал, көне шығармаларды орталық маманы Аязбек Рүстемов пен Арқалық Әмәлият төте жазудан аударма жасап, жинақтаған. Қолжазбаны бүгінге жеткізген Сақы Арынбекұлы Төлеш ақынмен бір атаның ұрпағы. Ағасы Төлештің мұраларын Сақы өзі көшіріп жазып, оның ұрпағына зияны тимесін, егер замана дауылы шайқаса, желі маған тисін деген себеппен жұртқа өзінікі ретінде таратып келген. Сөйтіп, халық ортасына ел аралап, жиын-тойларда әуен, қиссасымен жария етіп жүрген. Төлеш ақынның мұралары жалпы үлкен екі бөліктен тұрады. Бірінші бөлігі дастандар болса, оның түгеліне жуығы діни бағытта, яғни Пайғамбарымыздың дінді насихаттау барысындағы кәпірлермен соғыстары. Сонымен қатар сол кездегі батырлардың ерлігі және түрлі аңыздарды арқау еткен тарихи-әдеби туындылар да қамтылған. Ауылдың тұрмыс-тіршілігі мен сол кездегі совхоз, колхоз өмірімен қоса халықтың жай-күйін суреттеген де бірнеше дастаны бар. Ал екінші бөлігі – өлеңдер. Соның ішінде өсиет, бата, арнау, лирика бар. Бұл Төлеш ақынның және Сақы Арынбекұлының нағыз қалам қуатын көрсеткен, ақын ретінде таныта алатын мұралары деуге болады. Сақы Арынбекұлы мен Төлеш ақын – бір атаның балалары. Жасының кішілігі мен заманының кейіндігі бар Сақы ағасы Төлештің мұраларын өзі көшіріп жазып алған. Оның ұрпағына зияны тимесін, тиер таяғы болса, кәрі аяқ маған тисін деген ізгі ниетпен өзінікі ретінде жұртқа таратып келген. Сол мұра арқылы халық ортасында Сақы Арынбекұлы да ел аралап, жер аралап, той-томалақ, жиын-отырыстың ортасында әуенімен, қиссасымен ел-жұртқа жария етіп отырған. Бұған ақынның шығармалары, қолжазба нұсқалары нақты мысал бола алады.