Күлтөбе қалашығы несімен ерекшеленеді?

Түркістанда «Күлтөбе қалашығы» атты ашық аспан астындағы заманауи археологиялық парк салу жұмыстары жалғасуда. Қазіргі таңда жобаның алғашқы кезеңі аяқталды. Айта кетейік, аталмыш қалашық сан ғасырлық тарихы бар ежелгі Яссы қаласының бір бөлігі, яғни мемлекет тарапынан айрықша қорғалатын аумақта, Дүниежүзілік мәдени мұралар тізіміне енгізілген Қожа Ахмет Ясауи кесенесінің айналасында бой көтеретіндіктен, ол ЮНЕСКО-ның қадағалауымен жүзеге асуда. Нысан «Әзірет Сұлтан» мемлекеттік тарихи-мәдени қорық-мұражайына тиесілі болмақ. Жобаның екінші кезеңінде Күлтөбе қалашығы маңында заманауи туристік нысандар салуға көбірек көңіл бөлінбек. Жалпы бұл қалашыққа келген саяхатшылар қазақ халқының тарихынан, мәдениетінен, қасиетті Түркістан шаһарының өткенінен мол мағлұмат алады. Сонымен қатар, олар заманауи сандық технологиялар арқылы ежелгі заманға саяхат жасау мүмкіндігіне ие болады. Қызықты әрі маңызды бұл жобада 3D форматының жетістіктері қолданылмақ. Қалашық маңындағы нысандардың барлығы ою-өрнектермен безендіріледі. Онда өңірімізден табылған археологиялық жәдігерлер мен қазақ мәдениетінен, қолөнерінен сыр шертетін дүниелер де жұртшылық назарына ұсынылады деп күтілуде. Бұл жоба әлі де зерделенуде. Алдағы уақытта тиісті шешім қабылданады. Қазіргі таңда «Күлтөбе қалашығын» қалпына келтіру мен ғылыми-зерттеуге ЮНЕСКО мен ИКОМОС ұйымдарының дүниежүзілік мұра саласындағы халықаралық сарапшылары мен жергілікті ғалымдар атсалысуда. Қалашықта әртүрлі кезеңдердегі нысандардың эскиздері, қолөнершілердің тұрғын үйлері, заттар, ежелгі сауда көшелері, шеберханалар, ішкі аулалар және XII-XIX ғасырлардағы бекініс қабырғаларының элементтері табылған. Бұйыртса жәдігерлер «Күлтөбе қалашығы» паркінде саяхатшылардың назарына ұсынылмақ. «Күлтөбе қалашығы» атты ашық аспан астындағы археологиялық парктің құрылысын биыл аяқтау жоспарланған. Оның жалпы аумағы 30 гектарға жуық болса, көгалдандыру аумағы 20 гектардан асады. Қалашықтың барлық жағынан Ясауи кесенесі көрінеді. Қазір мұнда биіктігі 17 метр болатын шаңырақ іспеттес қондырғыларды орнату жұмыстары жүруде. «Қондырғылар жергілікті климатқа төзімді» дейді сала мамандары.