Маңғыстау облысы әкімінің баспасөз қызметі: «Сәуірдің 19-ы күні облыс әкімі Нұрлан Ноғаевтың төрағалығымен өңірдегі жер қойнауын пайдалану және карьерлердің жұмысына арналған жиын өтті. Жиынға карьер иелері, жеке кәсіпкерлер, облыстық мәслихаттың депутаттары, қоғам белсенділері, мемлекеттік органдардың өкілдері қатысты. Басқосуда өңірде орналасқан кен орындарын игеру мәселелеріне тоқталған облыстық жер қатынастары басқармасының басшысы Есемұрат Дүзмағамбетов: «Облыс аумағында 258 карьер бар. Соның ішінде 37-ісінің жұмысы тоқтап тұр. Қалған 221 карьердің жұмыс жасауға толық мүмкіндігі бар, алайда 2020 жылдың есебі бойынша олардың 103-інде өндіру жұмыстары мүлдем жүргізілмеген. Республика бойынша әктас тек қана Маңғыстау облысында өндіріледі. Әктас-ұлутастың ірі кен орындары Қарамандыбас, Жетібай және Бейнеуде шоғырланған. Ал құрылыс тасының (щебень) кен орындары Таушық, Шетпе ауылдарының маңында орналасқан. Маңғыстау ауданы Шетпе ауылының маңында 29 карьер бар. Қазіргі таңда оның 11-і жұмыс жасап тұр. Жергілікті тұрғындар карьер иелерінің экологиялық талаптарды бұзғаны туралы бірнеше рет шағымданған. Бұл мәселені Маңғыстау облысы бойынша экология департаментінің басшысы Руслан Түкенов те растады. Оның айтуынша, экология департаменті тоғыз субъектіге қатысты жоспардан тыс тексеру жүргізген. Нәтижесінде төрт карьер ұсақтау-сұрыптау қондырғыларының қызметін сот тәртібімен тоқтатып, оларға 30,0 млн.теңге көлемінде әкімшілік айыппұл салынған. Сонымен қатар кәсіпорындардың басшыларына карьерлердегі шаңды басуға арналған арнайы су қондырғыларымен жабдықтау тапсырылған. Бұл әдіс —шаң көлемін 60-80 пайыз азайтуға мүмкіндік береді. Сондай-ақ өндіріс аумағының ішкі жолдарына асфальт төсеу және шаң болмауы үшін автокөліктің дөңгелектеріне су сеуіп отыруға нұсқау берілген. Алайда, бүгінгі күнге дейін қойылған барлық талаптар орындалмаған. Зерттеу нәтижелері бойынша айына бір гектар жерге 58 келіден астам шаң түссе, бұл экологиялық жағдайға әсер етеді»,— деді.
Жиында сөз алған аймақ басшысы Нұрлан Ноғаев: «Өкінішке қарай, кейбір карьер иелері санитарлық нормаларды бұзып отыр, мұндай фактілер бар. Аудан әкімдігіне карьерден шығатын барлық жолдарға бақылауды күшейтуді және көліктерге шамадан тыс жүк тиелуіне жол бермеуді тапсырамын. Барлық меншік иелері өздерінің жауапкершілігін және қолданыстағы заңнаманың талаптарын, соның ішінде шаңды басу қажеттілігін білуі керек. Карьер иелерінің немқұрайды қарауынан іргелес жатқан елді мекендердің тұрғындары зардап шегуде. Сондықтан бақылауды күшейту керек» , – дей келіп, кәсіпкерлерді қоршаған ортаға зиян келтірмей, заңнамада белгіленген барлық талаптарды сақтай отырып жұмыс істеуге шақырды. Сондай-ақ, жауапты тұлғаларға бірқатар нақты тапсырмалар жүктеді.
