Мәжіліс депутаттары қазіргі Үкіметті конституциялық сотқа бермек. Бұл туралы мәжілісмен Никита Шаталов өзінің телеграм каналында айтты. Бұған 16 қаңтарда төменгі палатаның қарауына ұсынылған «Ақпаратқа қол жеткізу және қоғамдық қатысу мәселелері» туралы заң жобасы себеп. Құжатта ақпараттарға қатысты депутаттар әзірлейтін заңдарға Үкімет қорытынды беруі керек деп көрсетілген. Депутат Абзал Құспан бұл конституциялық заңға қайшы әрекет деп отыр. «Бұл заң жобасы заңнама және сот-құқықтық реформасы комитетінде үлкен сынға ұшыраған болатын. Неге? Не себепті? Бұл әдеттегідей заңдарға қайшы келсе бір жөн. Бұл жерде конституцияның нормасы бұзылып отыр. Атап айтқанда, 61-баптың 1-тармағында заң бастамасы Президентке, Үкіметке және Парламент депутаттарына тиесілі деп анық көрсетілген. Бүгінгі заң жобасын алып қарасақ, (17/2 бабын) депутаттардың заң шығару бастамасын шектеу тікелей көзделген. Президентіміздің «күшті Президент, ықпалды Парламент, есеп беретін Үкімет» деген формуласына негізделген бастамасына да тікелей қайшы келіп отыр. Бұл бастамаға сәйкес Үкімет Парламенттің алдында есеп беруі керек болса, бұл жерде керісінше, Парламент Үкіметтің алдында есеп беріп, оған бағынышты болмақ» дейді ол.
Ал депутат Ринат Зайытов: «Ақылдыны билегің келсе, ақымаққа қамшы беріп қой» деген жақсы сөз бар. Мына заң қашып құтыла алмайтынын білген соң, қуып қорқытпақшы болғанның кебі ме деп ойлап отырмын. Жеке талқылайық. Қазіргі сегізінші шақырылымның белсенділігіне қарай, өткенде Премьер-министрдің өзі де «Парламент өзіне тым көп алады. Бұл Үкіметке жұмыс істеуге бөгет жасап отыр» деп айтты. Жұмыс істеу деген халықтың игілігіне емес, тырнақшаның ішіндегі сөз. Ашық нормативтік-құқықтық актілер порталында (НҚА) депутаттық заң жобаларын жария талқылауды өткізу дейді де, «Үкімет қорытындысын ескере отырып» дейді. Үкімет қорытындысын ескеретін болсақ, қалғанының не қажеті бар?!».
Осындай үлкен текетірестен кейін «Ақпаратқа қол жеткізу және қоғамдық қатысу мәселелері» туралы заң жобасы әлі өңделіп, толықтырылып, «жал-құйрығы» күзелмесе, алдағы уақытта Парламент депутаттарының сынынан қорытынды шығармаса, заң болып бекуі қиын болмақ. Келешекте әр заң жобасы осылай депутаттардың белсенділігімен қабылданып отырса, оның халыққа тигізер пайдасы да зор деп ойлаймыз.
Міне, өздеріңіз көріп отырғандай, сегізінші шақырылым депутаттары өте белсенділік танытуда. Олар тіл мәселесінде де, ақпараттық құжатқа қатысты да, халықты толғандырып жүрген проблемалар тұрғысынан да өз ойларын еркін жеткізуде. Бұған қуануымыз керек!
